Akkan Suver: Azərbaycan vətəndaşları ölkədə görülən işləri dəyərləndirərək Prezident İlham Əliyevə yenidən etimad göstərdi
Ankara, 25 aprel, AZƏRTAC
Türkiyənin Mərmərə Qrupu Strateji və Sosial Araşdırmalar Vəqfinin sədri professor Akkan Suverin “Gözlem” qəzetində “...və Azərbaycan sabitlik dedi” sərlövhəli məqaləsi dərc olunub.
AZƏRTAC xəbər verir ki, məqalədə aprelin 11-də Azərbaycanda keçirilmiş seçkilərdən və Prezident İlham Əliyevin bu seçkilərdə qazandığı inamlı qələbədən bəhs edilir.
Müəllif Prezident İlham Əliyevin uğurlu daxili və xarici siyasəti, ölkəmizdə aparılan sosial-iqtisadi islahatların nəticələri barədə türkdilli oxucuları məlumatlandırır. Qeyd olunur ki, Azərbaycan vətəndaşları bütün bu işləri yüksək dəyərləndirərək səsvermədə yenidən Prezident İlham Əliyevə etimad göstərdi.
Diqqətə çatdırılır ki, Azərbaycan-Türkiyə qardaşlıq münasibətləri ümummilli lider Heydər Əliyev tərəfindən möhkəm təməl üzərində qurulub. Bu strategiyanın Prezident İlham Əliyev tərəfindən uğurla davam etdirilməsi iki qardaş ölkə arasındakı münasibətləri daha yüksək zirvələrə qaldırıb.
Bakı-Tbilisi-Ceyhan neft kəmərinin, Bakı-Tbilisi-Qars dəmir yolunun, uğurla həyata keçirilən Trans-Anadolu (TANAP) layihəsinin əhəmiyyəti barədə fikirlərini bölüşən professor qeyd edir ki, Prezident İlham Əliyevin yenidən dövlət başçısı seçilməsi Qafqazda sülhün bərqərar olmasına böyük töhfədir.
Məqalə Azərbaycan Respublikasının Prezidenti İlham Əliyevin Türkiyə Respublikasına rəsmi səfəri barədə fikirlərlə tamamlanır.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
