Ali Məhkəmədə açıq qapı günləri təşkil olunacaq
Bakı, 2 noyabr, AZƏRTAC
Azərbaycan Respublikası Ali Məhkəməsinin 100 illiyi ilə əlaqədar noyabrın 14-dən etibarən Ali Məhkəmənin inzibati binasında “Açıq qapı” günləri təşkil ediləcək.
Ali Məhkəmənin mətbuat xidmətindən AZƏRTAC-a verilən məlumata görə, vətəndaşlar əvvəlcədən qeydiyyatdan keçməklə həftədə bir gün Ali Məhkəmənin inzibati binası, iş fəaliyyəti, eləcə də Ali Məhkəmənin kitabxana və tarix muzeyi ilə tanış ola biləcəklər.
Həmçinin vətəndaşların ədalət mühakiməsinin həyata keçirilməsi sistemi ilə yaxından tanışlığı, Azərbaycan Respublikası Prezidenti İlham Əliyevin rəhbərliyi ilə ölkədə həyata keçirilən məhkəmə-hüquq islahatları, o cümlədən ədalət mühakiməsinə əlçatanlığın asanlaşdırılması, vətəndaşların müraciət imkanlarının genişləndirilməsi, elektron sistemlərin tətbiqi və digər yeniliklər barədə məlumatlandırılması, onlara hüquqlarının müdafiəsi mexanizmləri və sair barədə izahlar verilməsi nəzərdə tutulur.
“Açıq qapı” günlərində iştirak etmək istəyən şəxslərdən https://supremecourt.gov.az/siteform/opendays linki vasitəsilə qeydiyyatdan keçmələri xahiş olunur.
Bölmənin digər xəbərləri
