ALİ MƏKTƏB TƏLƏBƏLƏRİNİN “VERGİLƏR” MÖVZUSUNDA ÜÇÜNCÜ OLİMPİADASI KEÇİRİLMİŞDİR
AZƏRTAC xəbər verir ki, noyabrın 21-də Azərbaycan Dövlət İqtisad Universitetində (ADİU) ali məktəb tələbələrinin “Vergilər” mövzusunda üçüncü olimpiadası keçirilmişdir.
Açılış mərasimində ADİU-nun tədris işləri üzrə prorektor əvəzi Daməd Bağırov, Vergilər Nazirliyi tədris mərkəzinin rəhbəri Yaşar Kəlbiyev çıxış edərək ölkə Prezidenti İlham Əliyevin müvafiq Sərəncamı ilə təsdiq edilmiş “Azərbaycan Respublikasında vergi inzibatçılığının təkmilləşdirilməsi Dövlət Proqramı (2005-2007-ci illər)”nın əhəmiyyətini vurğulamışlar.
Bildirilmişdir ki, müvafiq proqrama uyğun olaraq ölkəmizin təhsil müəssisələrində vergilərin tədrisinə, bu sahədə biliklərin genişləndirilməsinə böyük önəm verilir.
Natiqlər olimpiadanın iştirakçılarına uğurlar arzulamışlar.
Bilik yarışında 10-dan çox ali təhsil müəssisəsinin, o cümlədən Azərbaycan Dövlət İqtisad Universiteti, Dövlət Neft Akademiyası, Qafqaz Universiteti, “Odlar Yurdu” Universitetinin ümumilikdə 200-dən artıq tələbəsi iştirak etmişdir.
İştirakçılar müəyyənləşdirilmiş vaxt ərzində 75 suala cavab vermişlər (onlardan 60-ı nəzəri, 15-i isə praktiki suallar olmuşdur). Nəzəri suallardan 30-u Vergi Məcəlləsinin tətbiqinin hüquqi aspektləri, 30-u isə fiziki və hüquqi şəxslərin vergiyə cəlb edilməsi məsələləri ilə bağlı olmuşdur.
Nəzəri suallar 2, praktiki məsələlərə dair suallar isə 3 bal ilə qiymətləndirilmişdir.
Sonda nəticələr açıqlanmış, qaliblər müəyyənləşdirilmiş və onlara mükafatlar təqdim olunmuşdur.
Bölmənin digər xəbərləri
