Azərbaycan Respublikasının Prezidenti Heydər Əliyev iyulun 9-da Prezident sarayında Almaniya Federativ Respublikasının dövlət katibi Aksel Gerlaxın başçılıq etdiyi nümayəndə heyətini qəbul etmişdir. 

Qonaqları səmimiyyətlə salamlayan Prezident Heydər Əliyev onların səfərə az vaxt ayırdıqlarını bildirdi, eyni zamanda burada çox yaxşı görüş keçirdiklərini və faydalı iş gördüklərini vurğuladı.

Səmimi qəbul üçün təşəkkürünü bildirən cənab Aksel Gerlax dedi ki,

Bakıya səfərimiz qısamüddətli olsa da, bu vaxtımızı səmərəli keçirmişik. Azərbaycana səfərimiz federal kansler Şröderin təklifi ilə olub və o, Sizə onun salamlarını çatdırmağı xahiş etmişdir. O, məndən bunu da xahiş etdi ki, biz Azərbaycana böyük nümayəndə heyəti ilə gələk, çünki mənim sərəncamımda 60-dan çox böyük müəssisə var. Bizim Azərbaycana səfərimiz təkcə özümüzün marağımızla bağlı deyil, bu, həm də alman xalqının sizin ölkənizə olan marağı ilə əlaqədardır. Ümumiyyətlə götürdükdə, bu, Almaniya iqtisadiyyatının ölkənizə olan marağından irəli gəlir.

Dövlət naziri bildirdi ki, nümayəndə heyəti əsasən iri müəssisələrin təmsilçilərindən ibarətdir. Lakin burada kiçik və orta müəssisələrin təmsilçiləri də vardır ki, bu da Almaniyanın iqtisadi spektrini müəyyənləşdirir. Bugünkü görüşümüz çox maraqlı keçdi və onun nəticələrini biz birgə təhlil edəcəyik.

Bu gün səhər tezdən bizim yüksək səviyyəli tədbirimiz oldu. Cənab nazir Fərhad Əliyev və mən də daxil olmaqla hər iki tərəfdən eyni sayda və səviyyədə nümayəndələr iştirak edirdilər. Cənab Fərhad Əliyev ölkənizdə keçirilən islahatlar və iqtisadi inkişaf barədə ətraflı məlumat verdi. Bir çox nazirlər söhbətdə iştirak etdilər. Bundan əlavə, biz bu gün iqtisadi siyasətlə bağlı görüşlər də keçirdik. Bank və maliyyə məsələləri, qeyri-neft sahəsi, eləcə də neftin nəqli ilə bağlı söhbətlərimiz oldu.

Cənab Prezident, Azərbaycana gəlməkdə əsas məqsədimiz təkcə Sizin gözəl ölkənizi görmək deyil, həm də iqtisadi əməkdaşlığımızı genişləndirməkdən, sadaladığım işləri görməkdən ibarət idi. Ona görə də mən təxminən 2-3 aydan sonra firma və müəssisələrin hər birindən soruşacağam ki, onların Bakıda apardıqları danışıqların nəticəsi nədən ibarət olmuşdur.

Nümayəndə heyətinin başçısı daha sonra vurğuladı ki, Almaniya ilə Azərbaycan arasında iqtisadi münasibətlər, müəssisələr arasındakı əlaqələr kifayət qədər yaxşıdır. Lakin bu əlaqələri daha da yaxşılaşdırmağa ehtiyac var. Bu, ilk növbədə ticarətə və sərmayə qoyuluşuna aiddir. Almaniya hökumətinin Azərbaycana sərmayələr ayırması üçün biz əlimizdən gələni edəcəyik. Azərbaycan təbii sərvətlərinə, xüsusilə neft və qazına görə çox zəngin ölkədir. Biz onların Almaniyaya çatdırılması barədə də düşünməliyik. Almaniya texnika və sənaye baxımından ən inkişaf etmiş ölkələrdəndir. Bu nailiyyətlərimizi Azərbaycanda da tətbiq etmək niyyətindəyik.

Cənab Gerlax dedi ki, mən Azərbaycan Prezidentinin neft sahəsində apardığı siyasəti həddən artıq dəstəkləyirəm. Mən özüm dünya ölkələri ilə iqtisadi əlaqələr sahəsində məsul şəxsəm. Bu işi hərtərəfli öyrənirəm. Qaz və neftin qiymətinin nisbətən aşağı düşdüyü məqamlarda da Sizin apardığınız siyasət xalqınızın rifah halının yüksəldilməsinə yönəldilmişdir. Latın Amerikasında, Şərqdə, dünyanın digər yerlərində iri neft ölkələri vaxtilə neftin qiymətinin yüksək olmasından yararlanaraq, elə bir siyasət yeritmişlər ki, indi qiymətlərin aşağı düşdüyü məqamlarda müəyyən problemlərlə qarşılaşırlar.

Amma Sizin apardığınız bu müdrik siyasət neftin qiymətlərinin dəyişməsi ilə yaranan kataklizmlərdən yaxa qurtarmağa imkan yaradır.

Prezident Heydər Əliyev federal kansler Şröderin salamını çatdırdığına görə qonağa təşəkkürünü bildirdi, eyni zamanda özünün də salamını, xoş arzularını federal kanslerə yetirməyi xahiş etdi.

Dövlətimizin başçısı qonaqlara müraciətlə dedi: Sizin buraya məhz federal kansler Şröderin göstərişi ilə səfər etməyiniz məni çox sevindirir və ruhlandırır. Çünki Azərbaycan Almaniya ilə bütün sahələrdə - iqtisadi, siyasi, digər sahələrdə əlaqələrə çox böyük əhəmiyyət verir. Biz bu əlaqələrin inkişaf etməsini istəyirik. Bir neçə il bundan öncə bizim əlaqələrimiz daha da çox idi, axır zamanlar bir az azalıbdır. Bu da məndə müəyyən qədər narahatçılıq hissi doğururdu. Mən bu barədə fikrimi cənab səfirə bildirmişdim. İndi, - bilmirəm, ya mənim arzuma görədir, yaxud siz də hesab etmisiniz ki, əlaqələrimizi daha da yüksəklərə qaldırmaq lazımdır, - iş adamları ilə Azərbaycana bu səfəri təşkil etmisiniz. Bu, əlaqələrimizin inkişaf etdirilməsində böyük addım hesab edilə bilər.

Azərbaycana səfərinizin məqsədi və burada gördüyünüz işlər haqqında verdiyiniz məlumatlar məni məmnun edir. İnanıram ki, siz burada bəyan etdiyiniz sözü yerinə yetirəcək, bir müddətdən sonra bütün müəssisələrdən tələb edəcəksiniz ki, Azərbaycanda apardıqları danışıqlarla əlaqədar nə işlər gördükləri barədə məlumat versinlər. Əgər həqiqətən belə olarsa, onda mən düşünəcəyəm ki, bəli, bizim iqtisadi əlaqələrimizin inkişaf etməsində ciddi mərhələ başlayır. Biz bunu istəyirik və çox çalışırıq ki, bu, olsun.

Prezident Heydər Əliyev daha sonra vurğuladı ki, Almaniya böyük ölkədir. Ancaq Qafqaz da dünyanın xüsusi əhəmiyyətli bir bölgəsidir. Qafqaz regionunda da Almaniyanın əməkdaşlıq etməsi üçün bütün parametrlərinə görə ən böyük imkanlara malik olan ölkə Azərbaycandır. Ona görə də bu fürsəti əldən vermək lazım deyildir. Almaniya Azərbaycana həmişə diqqət yetiribdir. X1X əsrin sonu - XX əsrin əvvəlində Azərbaycanda neft sənayesi inkişaf edərkən alman şirkətləri burada çox böyük işlər görüblər. Həmin dövrdə - yüz il bundan öncə “Simens” şirkətinin burada çəkdiyi bəzi kommunikasiya xətlərini tapıb üzə çıxartdıq. Azərbaycanın çox uzaq dağ rayonunda - Gədəbəydə alman şirkətləri mis yataqlarını işlətməklə də məşğul olmuşlar.

Xatirimdədir, İkinci dünya müharibəsindən öncə institutda oxuyarkən alman millətindən olan yoldaşlarım vardı, mənimlə birlikdə oxuyurdular. Yəni, demək istəyirəm ki, Azərbaycan Almaniya üçün dünyanın yeni bölgəsi, Afrika, yaxud da Şərqi Asiya deyil, Azərbaycan həm Avropadır, həm də Avropa ilə Asiyanı birləşdirən bir bölgədir. Bilirsiniz ki, buranın həm sərvətləri çoxdur, həm də əlverişli coğrafi-strateji vəziyyəti, kommunikasiyaları var. Şərq-Qərb, Şimal-Cənub dəhlizləri - bunların hamısı Azərbaycandan keçir. Sizi bir daha inandırmaq istəyirəm ki, bu səfəri etməklə düzgün addım atmısınız.

Mən bu gün bizim naziri də dinlədim. O da mənə geniş məlumatlar verdi. Bu məlumatlar bizim gələcək əməkdaşlığımız barədə nikbin əhval-ruhiyyə yaradır. Arzu edirəm ki, bunlar reallığa çevrilsinlər.

Cənab Aksel Gerlax vurğuladı ki, Qafqazın necə mühüm region olduğunu, burada Azərbaycanın hansı önəmə malik olduğunu Almaniyada hər kəs, o cümlədən yüksək dairələr də görür və dərk edirlər. Biz bilirik ki, Azərbaycan doğrudan da Şimal-Cənub və Şərq-Qərb dəhlizlərinin qovuşuğunda körpü rolunu oynayır. Biz onu da gözəl bilirik ki, Azərbaycan Avropanın tərkib hissəsidir. Sözümün üstündə dururam ki, iki-üç aydan sonra hər bir müəssisədən hesabat soruşacağıq və konkret olaraq iqtisadi sahədə hansı işlər görülməsini bir daha Sizin nəzərinizə çatdırmaq imkanı əldə edəcəyik. Mən federal kanslerimə Azərbaycana səfər barədə ətraflı hesabat verəcəyəm və düşünürəm ki, hər ikinizin təşəbbüsünüzün bu işlərin irəliləməsinə müsbət təsiri olacaqdır.

Qəbulda iqtisadi inkişaf naziri Fərhad Əliyev, Prezidentin Katibliyinin rəisi Dilarə Seyidzadə, AFR-in Azərbaycandakı səfiri Klaus Qrevlix və digər rəsmi şəxslər iştirak edirdilər.

AZƏRTAC

Foto Yaşar Xəlilovundur