Berlin, 13 avqust (AZƏRTAC). Azərbaycanın iki olimpiaçısı Toğrul Əsgərov və Şərif Şərifovun Londonda qələbə qazanması AFR-də Azərbaycan diasporunun böyük sevincinə səbəb olmuşdur. Almaniya Azərbaycanlıları Əlaqələndirmə Mərkəzinin (AAƏM) icraçı direktoru Samirə Patser-İsmayılova AZƏRTAC-a bildirmişdir ki, qazanılan qızıl medallar Azərbaycanda idmanın ölkənin ümumi inkişafı ilə bərabər irəliləməsindən xəbər verir. O demişdir: “Diqqət yetirin, səkkiz il əvvəl Afinada yığmamız ümumi komanda hesabında 50-ci yeri, 4 il əvvəl Pekində 40-cı, bu il Londonda isə 30-cu yeri tutmuşdur. Azərbaycan “Eurovision” mahnı müsabiqəsində də bu cür uğurlar nümayiş etdirmişdir. Təmsilçilərimiz ilbəil qələbəyə daha da yaxınlaşmış və birinciliyə bu cür can atmağın kulminasiyası bu il müsabiqənin Azərbaycan paytaxtında keçirilməsi olmuşdur. Əminəm ki, vaxt gələcək olimpiya məşəli Bakıda alovlanacaqdır!”

Svikau şəhərində həkim işləyən həmyerlimiz Kamran Məmmədov fəxrlə demişdir ki, Azərbaycan idmançıları ildən-ilə daha yaxşı nəticələr nümayiş etdirirlər.

Onun Berlində çalışan həmkarı Samir Mehdiyev vurğulamışdır ki, ermənilər bir dənə də olsun qızıl medal qazana bilməmişlər. Bəzi erməni KİV-ləri paxıllıq zəminində hətta gülməli bir ad da fikirləşib tapmışlar - “erməni diasporunun yığması”. Onlar Rusiya yığmasının tərkibində çıxış edən etnik erməninin qızıl medalını özlərinki hesab etmişlər. S.Mehdiyev demişdir: “Lakin hamı bilir ki, hesab idmançıların etnik mənşəyi ilə deyil, çıxış etdiyi ölkələr əsasında aparılır. Əgər ermənilərin metodikasından istifadə etsək, bizim medallarımıza iki medal da artırmaq olar, çünki daha iki etnik azərbaycanlı –Almaniyanın Nürnberq şəhərində doğulmuş və Türkiyə yığmasının tərkibində çıxış edən Sərvət Təzəgül taekvondo yarışlarında qızıl medal, ərdəbilli Səcat Anuşiravani Hamlabad ağır atletika yarışlarında gümüş medal qazanmışlar.

Almaniya KİV-ləri iki sərbəst güləşçimizin qələbəsini də geniş işıqlandırmışlar. Telekanallar Şərif Şərifovu və Toğrul Əsgərovun final çıxışlarını dəfələrlə nümayiş etdirmiş və atletlərimizin üstün cəhətlərini diqqətə çatdırmışlar.

Vüqar Seyidov

AZƏRTAC-ın xüsusi müxbiri

Berlin