Almaniyaya əfqan miqrantların qəbulu hökumət dəyişikliyinə qədər dayandırılıb
Berlin, 23 aprel, AZƏRTAC
Almaniya əvvəlcədən qəbul zəmanəti verilmiş Əfqanıstan vətəndaşlarının ölkəyə gətirilməsini hökumət dəyişikliyinə qədər dayandırıb.
AZƏRTAC “Tagesschau” xəbər xidmətinə istinadla bildirir ki, hazırkı hökumət Almaniyaya qəbul zəmanəti verilən 2600 nəfər Əfqanıstan vətəndaşının ölkəyə gətirilib-gətirilməməsi barədə qərarın yeni hökumət tərəfindən veriləcəyini açıqlayıb. Almaniyaya gətirilməsi nəzərdə tutulan əfqan miqrantlara Taliban tərəfindən təhdid edilən insan hüquqları fəalları və mədəniyyət işçiləri də daxildir. Hazırda Pakistanda qalan və qəbul zəmanətləri olan həmin şəxslər Almaniyaya gətirilmələrini gözləyirlər.
Xristian Demokratlar İttifaqı (CDU), Xristian Sosialistlər İttifaqı (CSU) və Sosial Demokratlar Partiyası (SPD) arasında razılaşdırılan koalisiya müqaviləsində könüllü qəbul proqramlarının mümkün qədər dayandırılacağı və yeni proqramların başlanmayacağı qeyd olunub. SPD jurnalistlər və ya Taliban rejiminin tənqidçiləri kimi təhdid altında olan insanlara verilən qəbul zəmanətlərinin yerinə yetirilməsini vacib hesab edir. Yeni hökumətin Daxili İşlər Nazirliyi isə bu zəmanətləri diqqətlə yoxladıqdan sonra onların geri götürülüb-götürülməyəcəyi barədə qərar verəcək.
Bundestaqda Kansler seçkisi mayın 6-da keçiriləcək. Buna qədər isə koalisiya müqaviləsi partiyalar tərəfindən təsdiqlənməlidir. CSU-nun İdarə Heyəti aprelin 10-da müqaviləni təsdiqləyib. CDU aprelin 28-də partiya konqresində, SPD isə aprelin 29-dək müqaviləni səsverməyə çıxaracaq.
Almaniyaya müxtəlif qəbul proqramları vasitəsilə indiyədək 36,3 min nəfər Əfqanıstan vətəndaşı gətirilib. Əfqanıstan üzrə qəbul proqramı çərçivəsində Almaniyaya gətirilən şəxslər üçün ümumilikdə 150 milyon avrodan çox vəsait xərclənib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
