AMEA Kimya Elmləri Bölməsinin institutlarının illik hesabatları dinlənilib
Bakı, 29 dekabr, AZƏRTAC
AMEA-nın Kimya Elmləri Bölməsinin illik hesabatlara həsr olunmuş iclası keçirilib. AMEA-nın vitse-prezidenti, Kimya Elmləri Bölməsinin Elmi şurasının sədri akademik Dilqəm Tağıyev iclasın bölməyə daxil olan institutlarının 2021-ci ildə apardıqları elmi-tədqiqat işlərinin yekunlarına həsr olunduğunu söyləyib.
Bu barədə AZƏRTAC-a AMEA-dan məlumat verilib. Bildirilib ki, akademik Yusif Məmmədəliyev adına Neft-Kimya Prosesləri İnstitutunun icraçı direktoru texnika elmləri doktoru Nizami Mürsəlov təmsil etdiyi müəssisədə cari ildə aparılan elmi-tədqiqat işləri, nəşr olunmuş məqalələr, tətbiq olunan işlər, beynəlxalq əlaqələr, keçirilən tədbirlər barədə məlumat verdi. O bildirib ki, cari ildə elmi müəssisədə 6 problem üzrə aparılan elmi-tədqiqat işlərinin nəticəsi olaraq 5 mühüm elmi nəticə əldə edilib. İnstitut əməkdaşları tərəfindən “Kaspi-X” inhibitoru və “Xəzər” deemulqatorunun istehsal texnologiyası təkmilləşdirilib və müvafiq müqavilələr əsasında istehsal edilib. Bu il əməkdaşlar tərəfindən alınmış Qarabağ-4 boy stimullaşdırıcısı Tərtər rayonunda sınaqdan keçirilib və yaxşı nəticələr əldə edilib.
Akademik Murtuza Nağıyev adına Kataliz və Qeyri-üzvi Kimya İnstitutunun icraçı direktoru AMEA-nın müxbir üzvü Məhəmməd Babanlı diqqətə çatdırıb ki, cari ildə institutda 3 problem üzrə aparılan elmi-tədqiqat işləri nəticəsində 7 mühüm elmi nəticə əldə edilib. İnstitut əməkdaşları 2021-ci ildə “Baku Steel Company” MMC, Azərbaycan Respublikası Müdafiə Nazirliyi, Saatlı rayonunun pambıqçılıqla məşğul olan fermer təsərrüfatları ilə müqavilələr əsasında tətbiqyönümlü birgə işlər aparıb və uğurlu nəticələr əldə ediblər.
Sonra akademik Əli Quliyev adına Aşqarlar Kimyası İnstitutunun baş direktoru akademik Vaqif Fərzəliyev təmsil etdiyi müəssisənin cari ildə aparılan elmi-tədqiqat işlərinin nəticələrini əks etdirən hesabatı təqdim edib. Akademik qeyd edib ki, institut əməkdaşları tərəfindən 2021-ci ildə 4 mühüm elmi nəticə əldə olunub. Eyni zamanda, cari ildə Aşqarlar Kimyası İnstitutu tərəfindən yaradılmış xüsusi təyinatlı itiyerişli nəqliyyatın yeni nəsil gücləndirilmiş dizel mühərriki üçün М-16ИХП-3у motor yağının Ukraynanın Xarkov şəhərində yerləşən “V.O.Malışev adına Zavod”da sınaqdan keçirilib və təqdim olunan motor yağının xeyli üstünlüyə malik olduğu müəyyən olunub. Cari ildə 17 patent alınıb. İnstitut alimlərinin məqalələrinə 250-yə yaxın istinad edilib. Hesabat ilində institutda Elmin İnkişafı Fondunun 4 qrantı çərçivəsində tədqiqatlar aparılıb.
Polimer Materialları İnstitutunun baş direktoru AMEA-nın müxbir üzvü Bəxtiyar Məmmədov təmsil etdiyi elmi müəssisədə cari ildə aparılan elmi-tədqiqat işləri, əldə olunan nəticələr, nəşr olunmuş məqalələr haqqında məlumat verib. Alim bildirib ki, Polimer Materialları İnstitutu cari ildə aparılan elmi-tədqiqat işləri 3 mühüm elmi nəticə ilə yekunlaşıb. Aparılan elmi-tədqiqat işlərinin nəticəsi 3 monoqrafiyada, 65 çap olunmuş məqalədə öz əksini tapıb.
Aparılan müzakirələrdə akademiklər Adil Qəribov, Abel Məhərrəmov və başqaları iştirak edərək fikir və təkliflərini səsləndiriblər.
Sonra çıxış edən akademik Dilqəm Tağıyev AMEA-nın 2020-2025-ci illər üçün qəbul edilmiş konsepsiyasında nəzərdə tutulmuş prioritet istiqamətlər üzrə tədqiqat işlərinin davam etdirilməsinin, eyni zamanda, respublika iqtisadiyyatına töhfə verə bilən elmi-tədqiqat işləri ilə bağlı aparılan araşdırmaların daha da genişləndirilməsinin vacibliyini vurğulayıb. Akademik qeyd edib ki, ölkəyə idxal olunan məhsulların yerli məhsullarla əvəz edilməsi sahəsində görülən işlərə diqqət artırılmalıdır.
Sonda iclasda Neft-Kimya Prosesləri, Kataliz və Qeyri-üzvi Kimya, Aşqarlar Kimyası və Polimer Materialları institutlarının 2021-ci ildə apardıqları elmi tədqiqat işlərinin yekunlarına dair hesabatların qəbul olunaraq AMEA-nın Rəyasət Heyətinə təqdim edilməsi qərara alınıb.
Bölmənin digər xəbərləri
