Vaşinqton, 14 yanvar (AZƏRTAC). ABŞ-ın siyasi dairələrində populyar olan nüfuzlu “The Hill” qəzetində Azərbaycanın xarici işlər naziri Elmar Məmmədyarovun “BMT Təhlükəsizlik Şurasında olduğu dövrdə Azərbaycanın təcrübəsi artmışdır” sərlövhəli məqaləsi dərc edilmişdir.

Ölkəmizin xarici siyasət idarəsinin başçısı yazır ki, Azərbaycan BMT Təhlükəsizlik Şurasının qeyri-daimi üzvləri sırasına daxil olandan dərhal sonra Prezident İlham Əliyev bu strukturda Azərbaycan üçün prioritet məsələlərin BMT-nin nizamnaməsində təsbit olunmuş ədalət ideallarına və beynəlxalq hüququn təntənəsinə dəstək verməkdən ibarət olacağını bəyan etmişdir.

Məhz bu konsepsiya çərçivəsində Azərbaycan təcrübəsini bölüşmüş, beynəlxalq sülhün və təhlükəsizliyin dəstəklənməsinə kömək etmişdir. E.Məmmədyarov yazır ki, Suriyada vəziyyət barədə müzakirələr Təhlükəsizlik Şurasının bu böhranın öhdəsindən gəlməsinə öz töhfəsini vermişdir. Azərbaycanın sədrliyi dövründə bir sıra başqa mühüm məsələlər, o cümlədən münaqişələrin humanitar nəticələri müzakirə edilmişdir.

Son iki ildə Təhlükəsizlik Şurasında müzakirə edilən bir sıra məsələlər barəsində konsensus əldə edilməsi Şura üzvlərinin konstruktiv əməkdaşlıq qabiliyyətini nümayiş etdirmişdir. Suriya məsələsi ilə yanaşı, bir sıra başqa problemlərin həlli istiqamətində, o cümlədən, Malidə, Konqo Demokratik Respublikasında münaqişələr, Sudan Respublikası ilə Cənubi Sudanın münasibətləri məsələsində də irəliləyiş göz qabağındadır.

Diplomat yazır ki, BMT Təhlükəsizlik Şurasının beş üzvü arasında fikir birliyi zəruridir, lakin qeyd etmək lazımdır ki, Təhlükəsizlik Şurasının daimi və qeyri-daimi üzvləri beynəlxalq sülhün və təhlükəsizliyin qorunub saxlanmasına görə kollektiv məsuliyyət daşıyırlar. Şuranın qeyri-daimi üzvlərinin bu prosesə müsbət təsir göstərmək, konsensus əldə edilməsinə öz konstruktiv töhfəsini vermək imkanı vardır.

2012-ci ilin may ayında, Azərbaycanın Təhlükəsizlik Şurasında birinci sədrliyi dövründə terrorizmə qarşı mübarizədə beynəlxalq əməkdaşlığın möhkəmlənməsinə dair Prezident İlham Əliyevin iştirakı ilə keçirilən yığıncaq yüksək səviyyədə olmuşdur. 2013-cü ilin oktyabr ayında Şurada ikinci sədrlik dövründə Azərbaycan BMT Təhlükəsizlik Şurası tarixində ilk dəfə olaraq İslam Əməkdaşlıq Təşkilatı ilə birgə iclas keçirmiş, bununla da hər iki qurum üçün misilsiz bir imkan - beynəlxalq sülhün dəstəklənməsi sahəsində əməkdaşlıq imkanı yaratmışdır.

E.Məmmədyarov yazır ki, Azərbaycan BMT Təhlükəsizlik Şurasının üzvü olduğu iki il ərzində Şura üzvü olan ölkələrin daha səmərəli əməkdaşlığının zəruriliyini və onların BMT Nizamnaməsindən irəli gələn vəzifələrini yerinə yetirməyə hazır olmalarını vurğulamışdır. Lakin BMT Təhlükəsizlik Şurasının bəzi qətnamələrinə məhəl qoyulmaması problemi hələ də aktualdır. Diplomat yazır ki, ərazilərinin bir hissəsi işğal altında olan, bir milyona yaxın əhalisi öz doğma torpaqlarından erməni silahlı qüvvələri tərəfindən zorla qovulmuş bir ölkə kimi Azərbaycan ona münasibətdə beynəlxalq hüququn fundamental norma və prinsiplərinin sistematik olaraq pozulmasının şahididir.

E.Məmmədyarov vurğulayır ki, iyirmi il bundan əvvəl, 1993-cü ildə BMT Təhlükəsizlik Şurası Ermənistan silahlı qüvvələrinin işğal etdikləri Azərbaycan ərazilərindən dərhal, tamamilə və danışıqsız çıxarılmasını tələb edən dörd qətnamə qəbul etmişdir. Bu qətnamələr Azərbaycanın ərazi bütövlüyünü, onun suverenliyini və beynəlxalq miqyasda tanınmış sərhədlərini növbəti dəfə təsdiq etmişdir.

Xarici işlər naziri öz məqaləsinin sonunda yazır ki, Azərbaycanın BMT Təhlükəsizlik Şurasında üzvlüyü onun xarici siyasətində yeni səhifə açmışdır və bu təcrübə, heç şübhəsiz, beynəlxalq sülhün və təhlükəsizliyin dəstəklənməsinə, mədəniyyətlərarası dialoqun və humanitar yardımın nizamlanmasına öz töhfəsini verəcəkdir.

Xatırladaq ki, 2011-ci il oktyabrın 24-də 17 raunddan ibarət səsvermədən sonra Azərbaycan ölkə diplomatiyası tarixində ilk dəfə olaraq BMT-nin üzvləri olan 155 ölkə tərəfindən BMT Təhlükəsizlik Şurasının qeyri-daimi üzvü seçilmişdir.

2012-2013-cü illərdə Azərbaycanla yanaşı, Mərakeş, Toqo, Qvatemala və Pakistan da Təhlükəsizlik Şurasının qeyri-daimi üzvləri olmuşlar. Bu müddət başa çatandan sonra 2014-2015-ci illər üçün ÇAD, Nigeriya, Çili, İordaniya və Litva BMT Təhlükəsizlik Şurasının yeni qeyri-daimi üzvləri seçilmişlər.

Yusif Babanlı

AZƏRTAC-ın xüsusi müxbiri

Vaşinqton