Moskva, 23 yanvar (AZƏRTAC). Ötən ilin sonlarında Moskvanın Birülyov rayonunda baş verən hadisələr Rusiyada Azərbaycan diasporunun möhkəmləndirilməsi və daha sıx birləşdirilməsi məsələsini gündəmə gətirmişdir. Bu ölkədə yaşayan azərbaycanlıların hüquqlarının müdafiəsi, əzəli vətənləri ilə əlaqələrinin gücləndirilməsi, Rusiya cəmiyyətinə inteqrasiyası və digər vacib problemlərin həllində ölkəmizin Rusiyadakı səfirliyi ilə yanaşı, Ümumrusiya Azərbaycan Konqresi (ÜAK) də əhəmiyyətli rol oynayır. Rusiya Federasiyasının nüfuzlu diaspor təşkilatlarından olan ÜAK-ın bu istiqamətdə fəaliyyəti və yeni ildə qarşıda duran vəzifələr barədə Konqresin Moskva vilayəti üzrə regional nümayəndəliyinin icraçı direktoru, Rusiyada fəaliyyət göstərən “Günay” istehsalat-kommersiya şirkəti direktorunun müavini Araz Mürsəliyevlə müsahibəni təqdim edirik.

- Rusiyada yaşayan və işləyən azərbaycanlıların böyük hissəsi Moskva vilayətində cəmləşmişdir. Bu baxımdan Konqresin Moskva vilayəti üzrə nümayəndəliyinin üzərinə daha çox məsuliyyət düşür. Qədəm qoyduğumuz ildə soydaşlarımızın problemlərinin həlli istiqamətində nə kimi işlər görüləcəkdir?

- İlk növbədə demək istərdim ki, yaxın günlərdə Domodedovo şəhərində ÜAK-ın Moskva vilayəti nümayəndəliyinin yeni binasının açılışı olacaqdır. Yeni ofisimizdə regionda yaşayan azərbaycanlıların problemlərinin həlli, ünsiyyəti, mədəni tədbirlərin təşkili üçün hər bir şərait yaradılacaqdır. Azərbaycan xalqının ümummilli lideri, diasporumuzun banisi Heydər Əliyevin həyat və fəaliyyətinin müxtəlif dövrlərindən bəhs edən sənədlər və fotoşəkillər, xüsusən SSRİ Nazirlər Soveti sədrinin birinci müavini işlədiyi dövrlərdə Rusiyanın müxtəlif regionlarına səfərləri və keçirdiyi görüşlər barədə arxiv materiallarının toplandığı muzey yaratmaq niyyətindəyik. Bundan əlavə, ofisimizdə rus dili və tarixinin tədrisi üçün də otaqlar ayrılacaqdır.

2014-cü ildən Rusiya miqrasiya qanunvericiliyinə əsaslı dəyişikliklər edilmişdir. Yeni tələblərə əsasən, bu ölkəyə gələn hər bir miqrantın rus dilini, Rusiya tarixini və qanunvericiliyini bilməsi də tövsiyə olunur. Düşünürəm ki, Moskva vilayətindəki soydaşlarımızın bu probleminin həllinə kömək edə biləcəyik. Eyni zamanda, onların miqrasiya qanunvericiliyinin tələbləri ilə tanış edilməsi, bu sahədə maarifləndirilməsi istiqamətində də iş aparacağıq. Mən özüm bir hüquqşünas kimi bu işin təşkilində yardımımı əsirgəməyəcəyəm. Bundan əlavə, Domodedovo şəhərində yeni uşaq bağçası binasının təməlini qoymuşuq. Bu müəssisədə digər körpələrlə yanaşı, azərbaycanlı balaları da tərbiyə alacaqlar.

- Son vaxtlar Azərbaycandan Rusiyaya miqrasiya axınında nə kimi dəyişikliklər baş vermişdir? Bununla bağlı hər hansı məlumat varmı?

- Müşahidələr və Rusiya Federal Miqrasiya Xidmətinin son məlumatına əsasən deyə bilərəm ki, Azərbaycandan Rusiyaya iş arxasınca gələnlərin sayı xeyli azalmışdır. Bu, əlbəttə, ilk növbədə ölkəmizdə siyasi və iqtisadi vəziyyətin ildən-ilə yaxşılaşması, insanların rifahının yüksəlməsi ilə əlaqədardır.

2013-cü ildə Azərbaycanda keçirilən prezident seçkiləri ərəfəsində Domodedovo şəhərində vilayətdə tanınan nüfuzlu azərbaycanlı, şəhər Şurasının deputatı Əlizaman Rəhimovun rəhbərlik etdiyi “Günay” İstehsalat-Kommersiya Firmasının və ÜAK-ın Moskva vilayəti üzrə nümayəndəliyinin təşkilatçılığı ilə keçirilmiş Prezidentə dəstək tədbirini xatırlatmaq istərdim. Tədbirin 700-dən çox iştirakçısı arasında yerli hakimiyyət orqanlarının rəhbərləri, ruslar və digər xalqların nümayəndələri də vardı. Onlar Rusiya Prezidenti Vladimir Putinin Azərbaycana səfərini, habelə ölkəmizin iqtisadi yüksəlişini əks etdirən videogörüntüləri maraqla qarşıladılar. Məqsədimiz Azərbaycan Prezidenti İlham Əliyevin respublikaya rəhbərliyi dövründə görülən geniş quruculuq işlərinin nəticələrini, xalqımızın həyat şəraitinin necə yüksəldiyini nümayiş etdirmək idi. Qeyd edim ki, bu cür tədbirlərdə iştirak edən digər xalqların nümayəndələri də Azərbaycanın sanballı, sözükeçərli bir dövlətə çevrildiyini etiraf edirlər.

Azərbaycan diaspor təşkilatları nümayəndələrinin bu yaxınlarda keçirilmiş videokonfransında Prezidentimizin diaspor üzvlərinə müraciətlə dediyi kimi, xaricdə yaşayan hər bir azərbaycanlı bilməlidir ki, onun arxasında güclü və qüdrətli Azərbaycan dövləti dayanmışdır. Bu, olduqca vacib məsələdir və xaricdə yaşayan azərbaycanlıların hörmətinin və nüfuzunun artmasına kömək edir.

- Azərbaycanın Rusiyadakı səfirliyi ilə əlaqələrinizi necə qurusunuz?

- Azərbaycan dövlətini Rusiyada təmsil edən rəsmi diplomatik nümayəndəlik olan səfirliyimizin təşəbbüslərimizi dəstəkləməsi çox vacibdir. Əlbəttə, xüsusilə Rusiyada böyük hörmət sahibi olan səfir Polad Bülbüloğlunun şəxsi nüfuzu sayəsində bir çox problemlərin öhdəsindən gələ bilirik. Rusiyada azərbaycanlıların sayının çox olması nəzərə alınaraq, Azərbaycan Prezidentinin Sərəncamı ilə təcrübəli diplomat, Azərbaycanın Sankt-Peterburqdakı keçmiş baş konsulu Qüdsi Osmanov səfirin müavini təyin olunmuşdur. Səfir Polad Bülbüloğlunun təşəbbüsü ilə Qüdsi Osmanov, Ümumrusiya Azərbaycan Konqresinin icraçı direktoru İlqar Hacıyev və səfirliyin müşaviri Aqşin Əliyevdən ibarət nümayəndə heyəti ilə Rusiyanın regionlarına səfərlər edirik. Bu yaxınlarda Ulyanovsk vilayətində çox əhəmiyyətli görüşlər keçirdik. Hər bir görüşdə Azərbaycan dövlətinin və Prezidentinin harada yaşamasından asılı olmayaraq bütün azərbaycanlıların dayağı olduğunu diqqətə çatdırırıq. Eyni zamanda, Rusiyanın regionları ilə ölkəmiz arasında işgüzar dostluq münasibətlərinin qurulması bütövlükdə Rusiya-Azərbaycan əlaqələrinin möhkəmlənməsinə və nəticə etibarilə bu ölkədə yaşayan soydaşlarımızın cəmiyyətdə mövqeyinin yüksəlməsinə töhfədir.

- Xaricdə yaşayan həmvətənlərimizin bir araya gəlməsində mədəni tədbirlərin rolunu necə qiymətləndirərdiniz?

- Yaşadığımız cəmiyyətə inteqrasiyadan nə qədər danışsaq da, soy-kökümüzü, el-obamızı, ənənələrimizi unutmamalıyıq. Bu baxımdan görkəmli azərbaycanlıların yubileylərinin, anım günlərinin, milli bayramlarımızın hamılıqla qeyd olunmasının əhəmiyyəti böyükdür. Son vaxtlar Moskva vilayətinin Domodedovo şəhərində Rusiyada yeganə Azərbaycan teatrı olan “Dərviş” teatrının kollektivi ilə dahi Üzeyir Hacıbəyovun “Arşın mal alan” operettasını səhnələşdirdik. Bir sıra Azərbaycan diaspor təşkilatları ilə birgə Xalq Yazıçısı Anarın və Xalq Şairi Məmməd Arazın yaradıcılığına həsr olunmuş tədbirlər təşkil etmişik. Bundan əlavə, Novruz bayramı və Dünya Azərbaycanlılarının Həmrəyliyi Gününə həsr olunmuş yüksək səviyyəli tədbirlər keçirmişik. Domodedovo şəhərində Azərbaycan və Rusiya xalqları arasında dostluq münasibətlərə həsr olunan tədbir maraqla qarşılanmışdır. Bütün bu layihələr üzərində çalışarkən müxtəlif diaspor təşkilatlarının fəaliyyətində maraqların birləşdirilməsinə xüsusi önəm verirdim. Odur ki, ümumi səylərimizin uğuruna sevinməyə bilmərəm. Bu, sübut edir ki, biz birlikdə işləyə bilirik və işləməliyik.

- Sizin aktiv ictimai fəaliyyətiniz yüksək qiymətləndirilmişdir. İlin yekunlarına görə həm Azərbaycanın Rusiyadakı Səfirliyinin, həm də ÜAK-ın fəxri diplomlarına layiq görülən yeganə diaspor fəallarından oldunuz. Domodedovo şəhər dairəsinin rəhbərinin xüsusi təşəkkürnaməsini də bura əlavə etsək, yəqin ki, işinizə verilən qiymətdən razısınız.

- Azərbaycan Respublikasının səfirliyi tərəfindən təltif olunmaq mənim üçün böyük şərəfdir və tərcümeyi-halımdakı bu faktla fəxr edirəm. Xüsusi olaraq xoşdur ki, səfirliyin mükafatı mənə Azərbaycan diasporunun birləşdirilməsinə yönəlmiş fəaliyyətimə görə verilmişdir. Mənə göstərdiyi etimada görə səfirimizə böyük minnətdarlığımı bildirmək istərdim. Əlbəttə ki, Ümumrusiya Azərbaycan Konqresinin prezidenti, akademik Məmməd Əliyevə də minnətdaram. Bu mükafatlar üzərimə daha fəal çalışmaq öhdəliyi qoyur. Domodedovo şəhər dairəsi rəhbərinin xüsusi təşəkkürnaməsinə gəlincə isə, zənnimcə, bu, Əlizaman Rəhimovun rəhbəri olduğu “Günay” şirkətinin işinə verilmiş qiymətdir. Bu şirkət şəhərin abadlığına yönəlmiş tikinti işlərindən əlavə, xeyriyyə fəaliyyəti ilə geniş şəkildə məşğul olur. İnanın ki, belə fəxri mükafatlar onların sahiblərini daha fəal işləməyə ruhlandırır.

Arayış: Araz Mürsəliyev 1976-cı ildə Azərbaycan Respublikasının Kürdəmir şəhərində anadan olmuşdur. 2005-ci ildə Bakı Dövlət Universitetinin hüquq fakültəsini bitirmişdir və hazırda M.V.Lomonosov adına Moskva Dövlət Universitetinin hüquq fakültəsinin, eyni zamanda Moskva Dövlət İnşaat Universitetinin magistridir. Ailəlidir, bir övladı var.

Fəridə Abdullayeva

AZƏRTAC-ın xüsusi müxbiri

Moskva