ANADOLU AGENTLİYİ AZƏRTAC-IN AVROPA XƏBƏR AGENTLİKLƏRİ ALYANSINA ÜZVLÜYÜNÜ HƏR ZAMAN DƏSTƏKLƏMİŞDİR
AZƏRTAC-ın xüsusi müxbiri xəbər verir ki, bu fikri Türkiyənin Anadolu agentliyinin Baş direktoru Hilmi Bengi Ankarada səfərdə olan Azərbaycan jurnalistləri ilə görüşdə söyləmişdir.
Türkiyənin Azərbaycandakı səfirliyinin təşəbbüsü ilə qardaş ölkədə səfərdə olan “Exo”, “Ekspress”, “Xalq cəbhəsi” qəzetlərinin, habelə “Xəzər” televiziyasının və APA agentliyinin müxbirləri ilə görüşən Hilmi Bengi bildirmişdir ki, dahi Atatürkün yaratdığı Anadolu agentliyi qardaş Azərbaycanın AZƏRTAC agentliyi ilə sıx əməkdaşlıq edir. Aprelin 29-dan mayın 3-dək Türkdilli Ölkələrin Xəbər Agentlikləri Baş Məclisinin VII iclası AZƏRTAC-ın təşkilatçılığı ilə Bakıda keçiriləcəkdir. Bu toplantıda quruma sədrlik AZƏRTAC-a keçəcəkdir.
Hilmi Bengi əlavə etmişdir ki, son illər dünya informasiya məkanında özünəməxsus yer tutan AZƏRTAC-ın ən nüfuzlu Avropa Xəbər Agentlikləri Alyansına üzv olması Azərbaycan həqiqətlərinin dünya və Avropa ictimaiyyətinə çatdırılmasında xüsusi əhəmiyyətə malikdir.
Bölmənin digər xəbərləri
