Bakı, 29 aprel, AZƏRTAC

Aprelin 29-da Dövlət İmtahan Mərkəzində (DİM) 2019-cu il mart və aprel aylarında keçirilmiş buraxılış imtahanları ilə əlaqədar mətbuat konfransı keçirilib.

AZƏRTAC xəbər verir ki, mətbuat konfransında çıxış edən Dövlət İmtahan Mərkəzinin Direktorlar Şurasının sədri Məleykə Abbaszadə indiyə qədər keçirilən buraxılış imtahanlarında 222 mindən çox abituriyentin iştirak etdiyini bildirib. Qeyd edib ki, martın 3-də və 10-da keçirilmiş IX sinif buraxılış imtahanlarının nəticələri artıq açıqlanıb. Martın 17-də və 31-də keçirilmiş imtahanların nəticələri isə müvafiq olaraq aprelin 30-da və mayın 6-da elan olunacaq.

DİM-in saytında öz balına və cavab vərəqlərinə baxanların sayı çox azdır

Nəticələri elan olunan abituriyentlərin DİM-in saytında bu nəticələrlə tanışolma sayına toxunan Məleykə Abbaszadə vurğulayıb ki, öz balına və cavab vərəqlərinə baxanların sayı çox azdır. Belə ki, martın 3-də keçirilən imtahanda iştirak edənlərdən 26857 abituriyent öz nəticələrinə (balına) baxıb. Cavab vərəqlərinə (verilən suallara hansı cavabı yazdığına) isə 10795 nəfər (29 faiz) baxıb. Digər imtahan iştirakçılarından 25762 abituriyent öz nəticələrinə (balına) baxıb. Cavab vərəqlərinə (verilən suallara hansı cavabı yazdığına) 6973 nəfər (18 faiz) baxıb. Xatırladaq ki, birinci imtahanda 37434, ikincidə isə 39700 abituriyentin iştirakı nəzərdə tutulub.

İmtahanlarda iştirakçıların hüquqları ilə yanaşı, vəzifələri də var

İmtahanlarda iştirakçıların hüquqları ilə yanaşı, vəzifələri də var. Bu vəzifələrin ən başlıcası tələb olunan imtahan qaydalarına əməl olunmasıdır.

Məleykə Abbaszadə deyib: “Çox təəssüf, zaman-zaman bəzi abituriyentlər qaydaları pozmağa cəhd göstərir və onlara qarşı müvafiq tədbirlər həyata keçirməyə məcbur oluruq. Saxta sənəd təqdim etmək, imtahana öz yerinə başqasını göndərmək, imtahan binasına, zalına mobil telefon və digər rabitə vasitələri gətirmək və onlardan istifadə etmək, başqasının cavab vərəqinə, sual kitabçasına baxmaq və ya öz cavab vərəqinə, sual kitabçasına başqasının baxması üçün şərait yaratmaq, cavab vərəqini və sual kitabçasını nəzarətçiyə təhvil vermədən imtahan zalından çıxmaq və digər pozuntular daha çox müşahidə olunur. Bütün bunlar DİM tərəfindən həyata keçirilən təhlükəsizlik tədbirlərinin daha da gücləndirilməsini, əlavə işçi qüvvəsinin cəlb olunmasını və imtahanların təşkilinə ayrılan xərclərin artırılmasını tələb edir”.

Təbii ki, abituriyentin göstərilən hərəkətlərə yol verməsi halları aşkar edildikdə o, imtahandan xaric olunur və onun imtahan nəticələri ləğv olunur. Həmçinin abituriyentin imtahan qaydalarına zidd hərəkətini imtahandan sonra da aşkar etmək üçün müxtəlif üsullardan istifadə edilir və yenə də DİM-in nəticələri ləğv etmək hüququ var.

Diqqətə çatdırılıb ki, aprelin 7, 14 və 21-də keçirilmiş tam (11 illik) orta təhsil səviyyəsi üzrə buraxılış imtahanlarında sual kitabçalarının dəyişdirilməsi, mobil telefon aşkar olunması və digər səbəblərdən ümumilikdə 31 abituriyent imtahandan xaric olunub və onların nəticələri ləğv olunub. İlkin məlumatlara əsasən, dünən keçirilən imtahanlarda da 17 nəfər tərəfindən qayda pozuntusu (5 - mobil telefon, 10 - sual kitabçalarının dəyişdirilməsi, 1 - çoxfunksiyalı elektron cihaz, 1 - başqasının yerinə imtahan binasına daxil olmağa cəhd) halına rast gəlinib. Bu imtahanlardan sonra aparılan araşdırmalar nəticəsində kommersiya məqsədilə fəaliyyət göstərən müxtəlif kurslar və orada repetitorluq fəaliyyəti ilə məşğul olan insanlar tərəfindən abituriyentlərin müxtəlif qayda pozuntularına yol verməyə sövq edilməsi halları aşkar olunub. Müxtəlif hazırlıq kurslarının əməkdaşları sosial şəbəkələrdə yaradılan səhifə və qruplarda imtahan suallarının əldə edilməsi, paylaşılması, hətta imtahandan öncə bir binada və zalda imtahan verən abituriyentlərin tapılması, tanış edilməsi və digər işlərin təşkil edilməsində fəallıq göstərirlər. Ötən il ali təhsil müəssisələrinə qəbul zamanı imtahanda iştirak etməli olan abituriyentin yerinə başqa birinin göndərilməsini təşkil edən (hazırda həmin şəxslərə qarşı cinayət işi açılıb), bu il aprelin 7-də keçirilən buraxılış imtahanından sonra sosial şəbəkələrdə sual kitabçasının fotoşəklinin ilk dəfə paylaşılması da hazırlıq kurslarının əməkdaşları tərəfindən edilib. Bu şəxslərin əsas məqsədi daha çox abituriyent kütləsi toplamaqla maddi qazanc əldə etmək olur və abituriyentlərin gələcək taleyi, çox təəssüf ki, onları maraqlandırmır.

Bir iştirakçıya güzəşt edilməsi, digər iştirakçıların hüquqlarının pozulması deməkdir

Dövlət İmtahan Mərkəzinin Direktorlar Şurasının sədri Məleykə Abbaszadə diqqətə çatdırıb ki, hazırda nəticələri ləğv olunan abituriyentlər, onların valideynləri kömək göstərilməsi və abituriyentlərin səhvlərinin bağışlanması ilə əlaqədar Dövlət İmtahan Mərkəzinə müraciət ediblər. Ancaq nəzərə almaq lazımdır ki, imtahan bir müsabiqədir və burada əsas məqsəd düzgün seçim etmək, daha bilikli şəxslərin müəyyən edilməsidir. Bir iştirakçıya güzəşt edilməsi, digər iştirakçıların hüquqlarının pozulması deməkdir. Ona görə də müsabiqə iştirakçıları, valideynlər daha çox diqqətli olmalı, məsələyə ciddi yanaşmalıdırlar. Qeyri-qanuni metodlara əl atmaq, onlardan istifadə etmək yolverilməzdir. Abituriyentlər və onların yaxınları yalnız biznes məqsədi ilə fəaliyyət göstərən kursların, müəyyən şəxslərin vədlərinə aldanmamalı, özlərinin sui-istifadə olunmasına şərait yaratmamalıdırlar.

Qeyd edək ki, aprelin 7, 14 və 21-də keçirilmiş XI sinif buraxılış imtahanları və aprelin 28-də əvvəlki illərin məzunları üçün qəbul imtahanlarının nəticələri yay qəbul imtahanlarınadək elan olunacaq.

Mart ayı üzrə ümumi (9 illik) orta təhsil bazasında DİM-də ən azı 6125092 yoxlama işi həyata keçirilib

Mətbuat konfransında mart ayında ümumi (9 illik) orta təhsil bazasında keçirilmiş buraxılış imtahanlarının materiallarının yoxlanılma prosesi haqqında məlumat da diqqətə çatdırılıb. Martın 3, 10 və 17-də cari ilin məzunları, martın 31-də isə ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları, əvvəlki illərdə təhsil sənədi ala bilməyən və eksternat qaydasında imtahan verən məzunlar üçün imtahanlar keçirilib. Dörd istiqamət üzrə keçirilmiş imtahanlarda ümumilikdə 115 mindən çox şagird iştirak edib.

Bu imtahanlarda şagirdlərə tədris dili, riyaziyyat və xarici dil fənləri üzrə onların bilik və bacarıqlarını yoxlamaq məqsədilə qapalı və açıq tipli 45 tapşırıq təqdim edilib. Bu suallardan 26-sı açıq tipli, yəni yazılı cavab vermək tələb olunan tapşırıqlardır. İmtahanın birinci mərhələsində şagirdlər hər fənn üzrə maksimum 30, ikinci mərhələdə isə 70 bal toplaya bilərlər. İkinci mərhələdə yalnız qapalı tipli tapşırıqlardan istifadə olunur. Beləliklə, hər iki mərhələ üzrə 135 tapşırıqdan 109-u ənənəvi qapalı formada olan tapşırıqlardır və şagirdlər yalnız bu qapalı tapşırıqların bir hissəsinə cavab verməklə də müsabiqə şərtlərini ödəyərək orta ixtisas təhsili müəssisələrinə qəbul ola bilərlər.

Ümumi yazı işlərinin sayı 3062546 olsa da, hər bir yazı işinin 2 marker tərəfindən qiymətləndirildiyini nəzərə alsaq (markerlərin qiymətləri arasında fərq yarandıqda həmin yazı işi proqram tərəfindən 3-cü markerə göndərilir) ən azı 6125092 yoxlama işi həyata keçirilib.

Mart-aprel aylarında DİM tərəfindən dövlət qulluğuna, Vəkillər Kollegiyasına, vergi orqanlarına, rezidenturaya qəbul və TOEFL imtahanları da keçirilib

Xatırladaq ki, Dövlət İmtahan Mərkəzinin martın 17-də dövlət qulluğuna qəbul (A növü - inzibati rəhbər vəzifə) üzrə keçirdiyi imtahanda 97 nəfər iştirak edib və 24 nəfər sertifikat alıb. Vəkillər Kollegiyasına martın 30-da keçirilmiş test imtahanında qeydiyyatdan keçmiş 238 nəfərdən (2 nəfər imtahana gəlməyib) 171 nəfər müsabiqə şərtini ödəyib. Vergi orqanlarına işə qəbul üzrə martın 30-da keçirilmiş test imtahanında qeydiyyatdan keçmiş 1544 nəfərdən (216 nəfər imtahana gəlməyib, 1 nəfər imtahandan xaric edilib) 108 nəfər müsabiqə şərtini ödəyib.

Aprelin 6-da keçirilmiş TOEFL imtahanında 12 nəfər iştirak edib və nəticələr ETS tərəfindən elan olunub. Aprelin 7-də rezidenturaya qəbul imtahanında 930 namizəddən (21 nəfər imtahana gəlməyib) və 459 nəfər müsabiqə şərtini ödəyib. Aprelin 21-də dövlət qulluğuna (B növü - inzibati icraçı vəzifə) qəbul üzrə test imtahanda 1754 namizəddən 412 nəfər sertifikat alıb.