Bakı, 13 aprel (AZƏRTAC). Aprelin 14-də Türkiyənin Trabzon şəhərində boks üzrə Avropa Olimpiya təsnifat yarışı start götürəcəkdir.

Azərbaycan Boks Federasiyasından AZƏRTAC-a bildirmişlər ki, Hayri Gür İdman Salonunda keçiriləcək turnirdə 44 ölkənin 211 idmançısı mübarizə aparacaqdır.

Trabzon turnirində London Yay Olimpiya Oyunlarına daha 26 vəsiqənin sahibi müəyyənləşəcəkdir.

Rusiya və Ukraynanın artıq 6 lisenziyası olduğundan onları qardaş ölkədə 4 boksçu təmsil edəcəkdir. Rusiya milli komandasının heyətinə 2007-ci ilin dünya çempionu Albert Səlimov, son Avropa çempionları Maksim Koptyakov və Məhəmməd Ömərov, həmçinin gənclər arasında dünya birinciliyinin qalibi Artyom Zaytsev daxil edilmişlər. Bu boksçulardan A.Səlimov 60 kq-da yarışacaq həmyerlimiz Elvin İsayevin potensial rəqiblərindəndir. Ukrayna millisi Türkiyədə ölkə çempionları Denis Şkarubo, Aleksandr Şepelyuk, gənclər arasında Avropa çempionu Pavlo İşenko və dünya çempionatının gümüş mükafatçısı Roman Kapitonenko ilə təmsil olunacaqdır.

Olimpiya Oyunlаrını qəbul edəcək Böyük Britaniya kvalifikasiya turnirində 5 boksçu ilə yarışacaqdır. Bunlar yeniyetmələr arasında keçmiş dünya çempionu Entoni Oqoqo, Avropa çempionatının bürünc mükafatçısı Çarli Edvards, gənclər arasında Avropa çempionu Martin Uord, Coş Teylor və Cozef Kordinadır.

İrlandiya yığmasının heyətində 18 yaşlı Avropa çempionu Cozef Uord eləcə də Pekin Olimpiadasının gümüş mükafatçısı Patrik Barns lisenziya qazanmağa daha çox şanslı sayılırlar.

Fransa millisi Bakıda keçirilən dünya çempionatında cəmi 3 vəsiqə qazandığından Trabzonda 7 boksçu ilə təmsil olunacaqdır. Heyətə WSB liqasında özünü yaxşı tərəfdən göstərmiş Noordin Oubali, Abdelkader Bouhenia və Toni Yoka kimi boksçular cəlb edilmişlər. Almaniya millisi də yarışda bir sıra gənc və istedadlı boksçularla təmsil olunacaq. Avropa çempionu Denis Makarov, dünya çempionatının bürünc mükafatçısı Ronni Beblik, Eugen Burhard və Yohan Vitt Bundestimin əsas lisenziya ümidləridir.

Gənclər arasında Avropa çempionu Filip Hrqoviç (Xorvatiya), Afina Olimpiadasının gümüş mükafatçısı Viktor Zuyev (Belarus), Avropa çempionu Vyaçeslav Qojan (Moldova) və Tervel Pulev (Bolqarıstan) Hayri Gür İdman Salonunda rinqə çıxacaq tanınmış boksçulardır.

Xatırladaq ki, ölkəmizi lisenziya turnirində Salman Əlizadə (49 kq), Məhəmməd Abdulhəmidov (56 kq), Elvin İsayev (60 kq), Tamerlan Abdullayev (69 kq) və Vətən Hüseynli (81 kq) təmsil edəcəklər.