Aqrar Universitetdə FAO-nun təşkilatçılığı ilə təlim kursu keçirilir
Bakı, 30 aprel, AZƏRTAC
Azərbaycan Dövlət Aqrar Universitetində (ADAU) BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin təşkilatçılığı ilə “Qafqaz və Orta Asiyada çəyirtkələr əleyhinə milli və regional mübarizənin təkmilləşdirilməsi proqramı” çərçivəsində təlim kursu işə başlayıb.
Təlimdə Kənd Təsərrüfatı Nazirliyi yanında Dövlət Fitosanitar Nəzarəti Xidmətinin əməkdaşları, ADAU-nun professor, müəllim və tələbə heyəti, eləcə də Azərbaycan Elmi-Tədqiqat Bitki Mühafizə İnstitutunun əməkdaşları iştirak edirlər.
Nazirlikdən AZƏRTAC-a bildiriblər ki, Məlumatların Toplanması üçün Avtomatlaşdırılmış Sistem (MTAS) də daxil olmaqla, çəyirtkəkimilərin monitorinqi və məlumatların idarə edilməsi üzrə təlim FAO-nun beynəlxalq məsləhətçiləri - ABŞ-ın Vayominq Universitetinin professoru Aleksandr Laçıninski və coğrafi informasiya sistemləri üzrə ekspert Nadiya Muratova tərəfindən aparılır. Təlim çəyirtkəkimilərin idarə olunması sahəsində ölkənin potensialını artırmağı və sürü halında hərəkət edərək, respublika ərazisində kənd təsərrüfatı bitkilərinə və miqrasiya etdikdə isə qonşu ölkələr üçün təhlükə törətmək imkanına malik olan zərərvericiyə nəzarət sisteminin səmərəliliyini yüksəltməyi nəzərdə tutur. Təlimin əsas məqsədi bu sahədə fəaliyyət göstərən mütəxəssislərin təkmilləşdirilməsindən ibarətdir.
Kursu Azərbaycan Dövlət Aqrar Universitetinin rektoru, professor İbrahim Cəfərov açaraq, tədbirin bitki mühafizəsi sahəsində əhəmiyyətindən danışıb. Sonra qarşıda duran problemlərin həlli yolları müzakirə edilib. Dövlət Fitosanitar Nəzarəti Xidmətinin rəis müavini Yaqub Cəfərov çəyirtkəkimilərlə mübarizədə Dövlət Xidmətinin gördüyü işlər, pestisidlərin tətbiqi zamanı istifadə olunan müasir tipli ultrakiçikhəcmli çiləyici aqreqatlar, eyni zamanda, bitki mühafizəsi sahəsində görüləcək işlər barədə məlumat verib.
Mayın 4-dək davam edəcək təlimdə zərərvericilər əleyhinə mübarizə tədbirlərini müasir tələblər səviyyəsinə çatdırmaq üçün çəyirtkələrin bioekologiyası, davranış və miqrasiyaları, onların miqdarca tənzimlənməsi məsələləri, monitorinqin əsasları, çəyirtkələrin miqdar və yayılmalarının qiymətləndirilməsi üsulları, çəyirtkələr üzrə məlumatların standartlaşdırılması, məlumat toplanmasının avtomatlaşdırılması sistemi və çəyirtkələrlə bağlı proqnozların hazırlanması məsələlərinə dair təqdimatlar keçiriləcək. Praktiki vərdişləri aşılamaq üçün zərərvericinin çoxalması və rezarvasiya mənbələrində tarla təcrübəsi və çəyirtkələr üzrə müasir müayinə üsulları nümayiş olunacaq. Təlim çəyirtkələrə dair statistik informasiyanın daxil olunması üçün interfeys və coğrafi informasiya sistemi məhsullarının yaradılması ilə yekunlaşacaq.
Qeyd edək ki, mayın 5-7-də Bakı şəhərində FAO-nun Azərbaycandakı Tərəfdaşlıq və Əlaqələndirmə ofisinin təşkilatçılığı ilə Qafqaz və Mərkəzi Asiya üzrə çəyirtkəkimilərin idarə edilməsinin təfsilatlı təqdimatı üzrə təlim təşkil olunacaq.
Bölmənin digər xəbərləri
