Armela Krasniqi: Uşaqları zərərli məzmundan qorumaq ehtiyacı heç vaxt bu qədər aktual olmayıb
Bakı, 15 aprel, AZƏRTAC
Uşaqları zərərli məzmundan qorumaq ehtiyacı bu gün heç vaxt olmadığı qədər aktuallıq kəsb edir. Albaniyada bu məsələ, ənənəvi və onlayn medianın, eləcə də müxtəlif platformaların həm böyüklər, həm də uşaqlar üçün informasiya, əyləncə və ünsiyyətə asan çıxış imkanı yaratdığı sürətlə dəyişən media mənzərəsi fonunda daha da mürəkkəbləşir.
AZƏRTAC xəbər verir ki, bu fikirləri Albaniyanın Audiovizual Media İdarəsinin sədri Armela Krasniqi aprelin 15-də Bakıda keçirilən Qara Dəniz Yayım Tənzimləyici Qurumlarının Forumunun 11-ci Toplantısında çıxışı zamanı səsləndirib.
O qeyd edib ki, Albaniya qanunvericiliyi, o cümlədən uşaq hüquqları və media etikası ilə bağlı tənzimləmələr, uşaqların zorakılıq, istismar və ya zərərli stereotiplər kimi uyğun olmayan məzmuna məruz qalmasının qarşısını almağa yönəlib.
“Audiovizual media ilə bağlı qanun və Uşaqların Müdafiəsi Strategiyası gündəlik fəaliyyətimizin əsas hüquqi çərçivəsini təşkil edir. Bununla yanaşı, biz uşaqlara və onların ailələrinə mürəkkəb media dünyasında məsuliyyətlə davranmağa yardım etmək üçün maarifləndirmə və media savadlılığının artırılmasına da xüsusi önəm veririk. Albaniya uşaqların təhlükəsizliyi üçün media tənzimlənməsi sahəsində əhəmiyyətli irəliləyişlər əldə etsə də, ölkə hələ də davamlı problemlərlə üzləşməkdədir”, - deyə Armela Krasniqi əlavə edib.
Bölmənin digər xəbərləri
