“ASAN Radio”da ADA Universitetinin bələdçiliyi ilə “Hello, America!” proqramı yayımlanacaq
Bakı, 29 aprel, AZƏRTAC
ADA Universiteti və “ASAN Radio” yeni media layihəsinə başlayır.
ADA Universitetindən AZƏRTAC-a bildirilib ki, ABŞ-ın Azərbaycandakı səfirliyinin və “IdeaLab” MMC-nin dəstəyi ilə həyata keçiriləcək layihə çərçivəsində 100 FM-də “Hello, America!” - “Salam, Amerika!” adlı həftəlik proqram yayımlanacaq. Proqramda Amerika cəmiyyətinin siyasi və sosial fərqlilikləri, ənənələri və mədəniyyəti barədə maraqlı müsahibələr və reportajlar yer alacaq.
Qeyd edək ki, layihənin başlanğıcı kimi ADA Universitetinin kommunikasiya üzrə müəllim heyəti, “ASAN xidmət”in ictimai əlaqələr şöbəsinin mütəxəssisləri və “ASAN Radio”nun yaradıcı heyət üzvləri Beynəlxalq Ziyarətçi Liderlik Proqramında iştirak edir, ABŞ-a səfər edib yerli radiostansiyalar, yayım üzrə təsisatlar və kommunikasiya fənnini tədris edən elm ocaqlarına baş çəkir, təcrübə mübadiləsi aparır və yeni tərəfdaşlıqlar qururlar.
“ASAN Radio”nun direktoru Emin Musəvi bildirib: “ASAN Radio” dövlət xidmətləri sahəsində ixtisaslaşan ilk və yeganə yayım kanalıdır. Ölkədə baş verən islahatlar, yeniliklər, xidmətləri ictimaiyyətə sürətli, ətraflı, həm də kreativ şəkildə çatdırmağa çalışırıq. Yayım sahəsi son illərin rəqəmsal texnologiyalarının inkişafından yararlanaraq kommunikasiyanın qurulmasını yeni üslub və strategiyalarla həyata keçirir. Əminəm ki, Amerika ilə təcrübə mübadiləsi radiostansiyamızın yayım keyfiyyətini bir qədər də artıracaq”.
Qeyd edək ki, ki, ADA Universiteti ilə “ASAN Radio” son iki ildə Avropa İttifaqının dəstəyi ilə “AvropadASAN” proqramını yayımlayır. Proqramın aparıcısı Şəfəq Mehrəliyeva deyib: “Birgə təcrübəmiz göstərir ki, ölkə ictimaiyyəti maarifləndirici və maraqlı məzmunlu proqramlara böyük ehtiyac hiss edir. “ASAN Radio” ilə ilk layihəmizdə olduğu kimi, bu dəfə də ADA Universiteti beynəlxalq münasibətlər və kommunikasiya sahəsində nəzəriyyəli biliklərini yaradıcı medianın köməyi ilə Azərbaycan dinləyicisi üçün maraqlı proqrama çevirəcək”.
ABŞ-ın Azərbaycandakı səfirliyinin mətbuat xidməti yeni layihəni belə şərh edir: “Bu layihədə kommunikasiya sahəsində təhsil və tətbiq mənasında iki aparıcı təşkilatla əməkdaşlıq qurduğumuzdan məmnunuq. Media layihəsinin əsas məqsədi azərbaycanlılara amerikalıları daha yaxşı tanıtmaq olsa da, ümid edirik ki, nəticə etibarı ilə, həm də ölkədə kommunikasiya üzrə tədris proqramlarını təkmilləşdirəcək və yerli yayımın keyfiyyətini artıracaq.”
“Hello, America!” proqramını mayın 3-dən etibarən hər cümə günü saat 18:45-də “ASAN Radio” 100 FM dalğasında, asanradio.az veb səhifəsi və ya “ASAN Radio” mobil telefon tətbiqi ilə dinləmək olar.
Bölmənin digər xəbərləri
