Aşqabadda MDB ölkələri ziyalılarının forumuna hazırlıq məsələləri müzakirə ediləcək
Aşqabad, 26 yanvar, AZƏRTAC
MDB Dövlətlərarası Humanitar Əməkdaşlıq Fondunun (DHƏF) nümayəndə heyəti yanvarın 28-də Aşqabada gedəcək.
AZƏRTAC xəbər verir ki, nümayəndə heyəti bu ilin may ayında Aşqabadda keçiriləcək MDB iştirakçısı olan dövlətlərin yaradıcı və elmi ziyalılarının XIV forumuna hazırlıq məsələlərinin müzakirəsi məqsədilə Türkmənistana səfər edəcək.
Nümayəndə heyəti DHƏF-in İdarə Heyətinin sədri, Azərbaycanın Xalq artisti Polad Bülbüloğlu, Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy və DHƏF-in icraçı direktoru Anatoli İksanovdan ibarət olacaq.
Səfər zamanı mədəniyyət və təhsil nazirliklərinin, həmçinin Türkmənistan Elmlər Akademiyasının nümayəndələri ilə humanitar əməkdaşlığın inkişafı məsələləri və DHƏF-in əməkdaşlıq layihələri barədə müzakirələr aparılacaq.
2006-cı ildən keçirilən forum ənənəvi olaraq MDB ölkələrinin paytaxtında təşkil edilir.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
