“Astana Finance Days - 2025” forumunda 1,5 trilyon dollarlıq aktivləri idarə edən şirkətlər təmsil olunur VİDEO
Astana, 4 sentyabr, AZƏRTAC
Sentyabrın 4-5-də Astana Beynəlxalq Maliyyə Mərkəzində “Astana International Forum”un dəstəyi ilə “Kapitalın gələcəyinin formalaşdırdığı məkan” adlı VIII “Astana Finance Days” forumu keçirilir.
AZƏRTAC xəbər verir ki, forumun ilk günündə qonaqları Qazaxıstanın inkişafı və unikallığı ilə tanış edən açılış mərasimi olub.
AIFC-nin qubernatoru Renat Bekturovun sözlərinə görə, illik “Astana Finance Days” forumu Avrasiyada müasir tendensiyaların və çağırışların müzakirəsi, habelə onların həlli yollarının tapılması üçün unikal platforma imicini qazanıb. O əlavə edib: “AFD yeni tərəfdaşlıqlar qurulması və bazar üçün vacib xəbərlərin elan edilməsi üçün platforma kimi fəaliyyətini davam etdirir”.
Öz növbəsində, məşhur futuroloq Brett Kinq qeyd edib ki, dünya süni intellektin yaranmasından tutmuş iqlim faktorlarının təsirinə qədər nəhəng dəyişikliklər dövrünü yaşayır. O vurğulayıb: “Ancaq bu gün qlobal bank sektoru rəqəmsal texnologiyalar sayəsində dərin transformasiyadan keçir: fintexin artıq ənənəvi banklarla müqayisədə 50% daha çox müştərisi var”.
Bu il tədbirdə ümumi həcmi 1,5 trilyon dollar olan aktivləri idarə edən şirkətlərin nümayəndələri iştirak edir ki, bu da tədbirin maliyyə institutları, biznes ictimaiyyəti, dövlət qurumları, Qazaxıstan və bütün Avrasiya regionunun ekspertləri arasında görüşlər, əməliyyatlar və dialoq üçün ən böyük platforma kimi mühüm rolunu əks etdirir.
Eyni zamanda, AIFC-nin unikal korporativ muzeyi - “Etimad Muzeyi” öz qapılarını forumun bütün qonaqlarının üzünə açır.
Bundan əlavə, 2024-cü ildə yaradılmış və AIFC-də daimi katibliyi olan Türk Yaşıl Maliyyə Şurasının ilk iclası “Astana Finance Days - 2025” forumu çərçivəsində keçiriləcək.
İclasda Türk Dövlətləri Təşkilatına üzv və müşahidəçi ölkələrin maliyyə tənzimləyici orqanlarının, iqtisadi-maliyyə qurumlarının, birjalarının rəhbərləri və nümayəndələri iştirak edirlər. Tədbirdən sonra tərəflərin davamlı yaşıl inkişafa, iqlim dəyişikliyinə uyğunlaşmaya və ətraf mühitin mühafizəsinə sadiqliklərini təsdiqləyən birgə Kommünike imzalanacaq.
Builki forumun özəlliyi “Astana Finance Days” tədbirinin vahid sərgi platforması olan AFD Sərgi Mərkəzi olacaq. O, kapital və rəqəmsal innovasiya bazarlarında fəaliyyət göstərən şirkətləri bir araya gətirəcək və həll yollarını nümayiş etdirmək, bazarda yerləşməni təkmilləşdirmək, strateji tərəfdaşlarla birbaşa əlaqələr yaratmaq üçün məkan təmin edəcək.
Tədbirin informasiya tərəfdaşları arasında Azərbaycan Dövlət İnformasiya Agentliyi - AZƏRTAC da var.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
