Avropa Komissiyası Altsheymer xəstəliyinə qarşı yeni dərmanın istifadəsinə icazə verib
Berlin, 17 aprel, AZƏRTAC
Avropa Komissiyası Altsheymer xəstəliyinin erkən mərhələsində tətbiq olunacaq yeni dərman vasitəsi – “Lecanemab” adlı antitelin istifadəsinə ilk dəfə icazə verib.
AZƏRTAC xəbər verir ki, bu dərman indiyədək tətbiq edilən müalicə üsullarından fərqli olaraq, xəstəliyin əsas səbəblərinə qarşı təsir göstərməyi hədəfləyir. Altsheymer xəstəliyinin gedişatını bir qədər ləngidə bilən “Lecanemab” yalnız yüngül əqli pozğunluq və ya yüngül demensiya mərhələsində olan pasiyentlərdə istifadə oluna bilər. Bundan əlavə, pasiyentlər müəyyən genetik göstəricilərə malik olmalıdırlar.
Avropa Dərman Agentliyinin (EMA) tövsiyəsi əsasında təsdiq olunan dərman ciddi şərtlərlə istifadəyə buraxılıb. Klinik tədqiqatlara əsasən, “Lecanemab” müalicəsi alan pasiyentlərdə demensiya əlamətlərindəki irəliləmə səviyyəsi cüzi şəkildə daha yavaş müşahidə olunub. Bununla belə, mütəxəssislər gündəlik həyatda bu təsirin nə dərəcədə nəzərəçarpacaq olduğunun sual altında qaldığını bildirirlər.
Dərmanın istifadəyə tam hazır olması bir neçə ay çəkə bilər. İstehsalçı bu müddətdə həkimlər üçün təlimlər hazırlamalı və müşahidə reyestri qurmalıdır.
Almaniya üzrə təxminən 1,2 milyon Altsheymer xəstəsindən yalnız 20 minə qədəri bu terapiya üçün potensial namizəd sayılır. Qadınlarda dərmanın effektivliyi daha zəif, yan təsir riski isə yüksək qiymətləndirilir. Müalicənin Avropadakı qiyməti hələ açıqlanmasa da, ABŞ-da illik xərc təxminən 26 min dollardır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
