AVSTRİYA FEDERAL KANSLERİ POLŞADA İŞGÜZAR SƏFƏRDƏDİR
AZƏRTAC-ın müxbiri Avstriya Federal Kansler Aparatına istinadla xəbər verir ki, Avstriya federal kansleri Alfred Quzenbauer Polşaya işgüzar səfərə getmişdir. Səfər Avropa İttifaqının hazırkı sədri Almaniyanın federal kansleri Angela Merkelin xahişi ilə baş tutmuşdur. Səfərin məqsədi Avropa Konstitusiyası ilə bağlı Polşanın tutduğu sərt mövqeyi yumşaltmaq və ümumi prinsipləri müzakirə etməkdir. Polşa tərəfi qərarların qəbul olunması üçün konstitusiya layihəsində nəzərdə tutulan səsvermə prinsipini və Aİ-nin dövlət rəmzlərinə malik olmasını rədd edir.
Quzenbauer səfər çərçivəsində Polşanın Baş naziri Yaroslav Kaçinski və Seymin sədri Ludviq Dorn ilə görüşlər keçirəcəkdir. Quzenbauerin Polşa və digər ölkələrə səfərləri və telefon danışıqlarının məqsədi iyunun 26-da keçiriləcək Avropa İttifaqı zirvə toplantısınadək Konstitusiyanın əsas prinsipləri ilə bağlı ümumi razılığın əldə olunmasıdır. Son dövrlərdə Almaniya tərəfi “konstitusiya” sözündən imtina edərək, “Avropa Sazişi” anlayışına üstünlük verir.
Həftənin sonunadək Polşanın yüksək rütbəli məmurları danışıqları davam etdirmək üçün Berlinə səfər edəcəklər. Polşa mətbuatında bu həftə “qəti qərarların gözlənildiyi günlər” kimi qeyd edilir.
Yaxın müddətdə A.Quzenbauerin eyni məqsədlə digər Şərqi Avropa ölkələrinə də səfərləri gözlənilir.
Bölmənin digər xəbərləri
