Bakı, 22 dekabr (AZƏRTAC). Bakı İdman Sarayında boks üzrə böyüklər arasında Azərbaycan çempionatı davam edir. Yarışın ikinci günündə 52, 56, 60, 64, 75, 91 və 91 kq-dan yuxarı çəki dərəcələrində mübarizə aparan idmançılar rinqə çıxmışlar.

AZƏRTAC xəbər verir ki, 56 kq çəki dərəcəsinin əsas favoritlərindən olan Rəhim Nəcəfov ilk döyüşünü qələbə ilə başa vurmuşdur. O, Sumqayıt nümayəndəsi Tahir Allahverdizadəni 17:5 hesabı ilə məğlub etmişdir. 64 kq çəki dərəcəsində qələbəyə namizədlərdən olan Elnur Əliyev, Elnur Zeynalov və Mehdi Mehdiyev növbəti mərhələyə vəsiqə qazanmışlar. Əliyev “Təhsil” İdman Mərkəzinin üzvü Rauf Həmidovu minimal üstünlüklə məğlub etmişdir – 18:17. Mehdiyev “Turan” klubunun nümayəndəsi Anar Hüseynovu 11:4 hesabı ilə üstələmişdir. Zeynalov isə Şəmkir boksçusu Amil Cəfərovu üstələmişdir.