AZƏRBAYCAN DİPLOMATİYA AKADEMİYASI YAY MƏKTƏBİNƏ QƏBUL ELAN ETMİŞDİR
AZƏRTAC xəbər verir ki, məktəbə qəbul iyulun 11-20-də Bakıda və Qubada keçiriləcəkdir.
Yay məktəbi müxtəlif mədəniyyətlərin dinc yanaşı yaşadığı yerlərdə təşkil ediləcəkdir. Məktəbin iştirakçıları İslamın əsas konsepsiyaları, onun digər dinlərlə qarşılıqlı münasibətləri və müasir beynəlxalq münasibələrdə rolu ilə tanış olacaqlar.
Tədbirdən məqsəd mədəniyyətlərarası dialoqu genişləndirmək və İslamın dünyəvi və sosial ədalət dini kimi başa düşülməsinə şərait yaratmaqdır. Müxtəlif millətlərin nümayəndələri ilə ünsiyyət, görməli yerlərlə tanışlıq və istirahət yay məktəbinin baza elementləri olacaqdır.
İçərişəhər, Atəşgah dövlət tarix-memarlıq və Qobustan dövlət tarixi-bədii qoruqlarına tanışlıq turları da təşkil ediləcəkdir.
İstirahət günləri Azərbaycanın bölgələrinə səfərlər nəzərdə tutulmuşdur. Tədbir iştirakçıları ölkəmizin tarixi və mədəni irsi ilə tanış olmaq imkanı əldə edəcəklər. Yay məktəbinin iştirakçıları müqəddəs yerləri də ziyarət edərək, Azərbaycanda dini tolerantlığın əsrlər boyu mövcud olduğunu əyani surətdə görəcəklər.
Qeyd edək ki, hər sinifdə 35-dək iştirakçı olacaqdır. Yay məktəbində təhsil haqqı isə 750 ABŞ dollarıdır.
Bölmənin digər xəbərləri
