Azərbaycan elminin gələcək inkişafı gənc kadrların potensialından asılıdır
Bakı, 26 noyabr (AZƏRTAC). Azərbaycan Milli Elmlər Akademiyasının (AMEA) Mərdəkan Dendrarisində Gənc Alim və Mütəxəssislər Şurasının təsis yığıncağı keçirilmişdir.
AMEA-dan AZƏRTAC-a bildirmişlər ki, tədbirdə Mərdəkan Dendrarisinin direktoru, AMEA-nın müxbir üzvü Tofiq Məmmədov yeni şura haqqında məlumat vermişdir.
Bildirmişdir ki, Azərbaycan elminin gələcək inkişafı gənc kadrların potensialından asılıdır. O, şura üzvlərinin maraqlı layihələr və yeni fikirlər irəli sürərək dünyanın nüfuzlu universitetləri, elmi-tədqiqat müəssisələri ilə sıx elmi əməkdaşlıq əlaqələri yaradacaqlarına, Azərbaycan Respublikasının Prezidenti yanında Elmin İnkişafı Fondunun qrant layihələrində yaxından iştirak edəcəklərinə ümidvar olduğunu söyləmişdir.
Son vaxtlar AMEA-da bir çox elmi islahatların aparıldığını söyləyən Mərdəkan Dendrarisinin elmi işlər üzrə direktor müavini, biologiya üzrə fəlsəfə doktoru Zenfira Məmmədova şuranın yaradılmasını gənc alim və mütəxəssislərə olan diqqətin nəticəsi kimi qiymətləndirmişdir.
Sonra səsvermə yolu ilə yeni təsis olunan şuranın üzvləri seçilmişlər.
Tərkibi 14 nəfərdən ibarət olan şuranın sədri biologiya üzrə fəlsəfə doktoru Zaman Məmmədov, sədr müavini Samirə Bağırova, katibi Elnarə Salahova seçilmişlər.
Bölmənin digər xəbərləri
