Tokio, 14 yanvar (AZƏRTAC). Azərbaycanın Yaponiyadakı səfiri Gürsel İsmayilzadə Qunma prefekturasının Qızlar Universitetində ölkəmiz haqqında təqdimatla çıxış etmişdir.

Tədbiri giriş sözü ilə açan universitetin professoru Toru Anzai bildirmişdir ki, Azərbaycanın qazandığı uğurlar Yaponiya ictimaiyyəti tərəfindən də maraqla izlənilir. Tədbirin məqsədi son illər sürətlə inkişaf edərək regionun lider dövlətinə çevrilmiş Azərbaycan haqqında daha ətraflı məlumatların əldə edilməsidir.

Sonra Azərbaycanın Yaponiyadakı səfiri Gürsel İsmayılzadə Azərbaycanın dövlət atributları, coğrafi mövqeyi, tarixi, əhalisi, təbiəti, iqtisadiyyatı, enerji siyasəti, ölkəmizdə həyata keçirilən layihələr, son illərdə əldə olunmuş nailiyyətlər barədə ətraflı danışmışdır. Səfir dinləyiciləri 2013-cü il oktyabrın 9-da keçirilmiş prezident seçkiləri haqqında da məlumatlandırmışdır. Bildirmişdir ki, seçkilər azad, ədalətli və şəffaf, bir sıra beynəlxalq təşkilatların və müstəqil müşahidəçilərin də qeyd etdikləri kimi, qanun pozuntusu olmadan, demokratik şəraitdə keçirilmiş, Azərbaycan xalqı səsvermə prosesində fəal iştirak etmişdir.

Diplomat Azərbaycanın dövlətçilik ənənələrindən, Azərbaycan Xalq Cümhuriyyətinin fəaliyyətindən, Şərqdə ilk parlamentin yaradılmasından, qadınlara seçki hüququnun verilməsindən danışmışdır. Dövlət müstəqilliyinin bərpa edilməsindən ötən 23 ildə Azərbaycanın beynəlxalq arenada nüfuzunun getdikcə gücləndiyi tədbir iştirakçılarının diqqətinə çatdırılmışdır.

Azərbaycanda son illər həyata keçirilən islahatlardan danışan səfir Gürsel İsmayılzadə vurğulamışdır ki, dövlətimizin başçısı tərəfindən atılmış müvafiq addımlar nəticəsində ölkəmiz sabit siyasi sistemə malik demokratik dövlətə çevrilmişdir. Uğurlu iqtisadi siyasət son illərdə ümumi daxili məhsulun bir neçə dəfə artmasına səbəb olmuş, ölkəyə sərmayə qoyuluşu üçün əlverişli mühit yaradılmışdır. Ölkəmizin dünyanın enerji təhlükəsizliyinin təmin edilməsində oynadığı mühüm rol xüsusi qeyd olunmuşdur. Bundan əlavə, Azərbaycan hökumətinin qeyri-neft sektorunun inkişafına xüsusi diqqət yetirdiyi vurğulanmış, sənaye, turizm, kənd təsərrüfatı, alternativ və bərpa olunan enerji mənbələri sahələrində geniş imkanların mövcudluğu bildirilmişdir. Təqdimatda Azərbaycanın etibarlı tərəfdaş kimi beynəlxalq münasibətlər sistemində özünü doğrultduğu diqqətə çatdırılmış, ölkəmizin 2012-2013-cü illər üçün BMT Təhlükəsizlik Şurasına qeyri-daimi üzv seçilməsinin bunun bariz nümunəsi olduğu vurğulanmışdır.

Azərbaycanda aparılan böyük quruculuq işlərindən, infrastruktur layihələrdən danışan səfir ölkəmizdə turizmin inkişafı haqqında da geniş məlumat vermişdir.

Tədbirdə Azərbaycanın tarixini və mədəniyyətini, incəsənətini, mətbəxini, rəqslərini, xalçalarını, turizm potensialını əks etdirən videofilm nümayiş etdirilmişdir.

Gürsel İsmayılzadə iki xalq arasında əlaqələrin genişləndirilməsində gənclərin böyük rol oynadığını qeyd edərək Bakı Dövlət və Azərbaycan Dillər universitetlərində yapon dilinin tədris olunduğu, azərbaycanlı gənclərin Yaponiyanın bir sıra universitetlərində təhsil aldıqları barədə məlumat vermişdir.

Azərbaycanda tarixən qadınlara xüsusi hörmət və ehtiramla yanaşıldığı, onların cəmiyyətin həyatında fəal mövqe tutduğu qeyd edilmiş, tanınmış xanımlarımızın adları diqqətə çatdırılmışdır. Azərbaycanın birinci xanımı, UNESCO-nun və İSESCO-nun xoşməramlı səfiri Mehriban Əliyevanın rəhbərlik etdiyi Heydər Əliyev Fondu tərəfindən həyata keçirilən çoxsaylı layihələr haqqında ətraflı məlumat verilmişdir. Fondun vitse-prezidenti Leyla xanım Əliyevanın çoxşaxəli fəaliyyətindən də ətraflı söhbət açılmışdır.

Diplomat, həmçinin Ermənistanın Azərbaycana qarşı hərbi təcavüzü, respublikamızın ərazisinin 20 faizinin işğal olunması, bunun nəticəsində bir milyondan çox azərbaycanlının qaçqın və məcburi köçkün vəziyyətinə düşməsi haqqında məlumat vermişdir.

Təqdimatın sonunda səfir Gürsel İsmayılzadə tədbir iştirakçılarının çoxsaylı suallarını ətraflı cavablandırmış, xatirə şəkli çəkdirilmişdir.

“İRS” jurnalının yapon dilində nəşr edilmiş dördüncü nömrəsi tədbir iştirakçılarına paylanılmışdır.

Vüqar Ağayev

AZƏRTAC-ın xüsusi müxbiri

Tokio