Azərbaycan Ombudsmanının nümayəndəsi Vyanada beynəlxalq iclasda iştirak etmişdir
Bakı, 14 aprel (AZƏRTAC). Avstriyanın paytaxtı Vyana şəhərində ATƏT-in Demokratik Təsisatlar və İnsan Haqları Bürosunun (DTİHB) təşkilatçılığı ilə işgəncələrin qarşısının alınmasında insan ölçüsünə dair əlavə iclas keçirilmişdir.
Azərbaycan Respublikasının İnsan Hüquqları üzrə Müvəkkili Aparatının İşgəncələrin qarşısının alınması şöbəsinin müdiri, Ombudsmanın Milli Preventiv Qrupunun (MPQ) rəhbəri Vüqar Məhərrəmov tədbirdə iştirak etmişdir.
Ombudsman Aparatının mətbuat xidmətindən AZƏRTAC-a bildirmişlər ki, tədbirdə “İşgəncələrə yol verilməməsində insan ölçüsünə dair 2003-cü ildəki əlavə iclasın keçirildiyi vaxtdan ATƏT regionunda bu istiqamətdə əldə edilmiş nəticələrin qiymətləndirilməsi”, “Dövlət səviyyəsində fəaliyyət və milli preventiv mexanizmlərin rolu”, “İşgəncələrin qarşısının alınması sahəsində ATƏT tərəfindən üzv-dövlətlərə dəstəyin rolu: növbəti addımlar” və digər mövzularda müzakirələr və fikir mübadiləsi aparılmışdır.
V.Məhərrəmov “BMT-nin İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyası”nın Fakültativ Protokolunun tələblərindən irəli gələn məsələlər və ölkəmizdə Milli Preventiv Mexanizmin (MPM) fəaliyyəti barədə çıxış etmiş, ölkəmizdə Fakültativ Protokolun icrasının təmin edilməsi məqsədilə Ombudsmanın MPM qismində fəaliyyəti ilə bağlı məlumat vermişdir.
Azərbaycan Ombudsmanının nümayəndəsi MPQ üzvlərinin azadlıqdan məhrumetmə yerlərinə, o cümlədən müvəqqəti saxlanma yerlərinə, penitensiar müəssisələrə, psixiatriya xəstəxanalarına, sosial obyektlərə başçəkmələr həyata keçirilməsi, “Həbs yerlərində saxlanılan şəxslərin hüquq və azadlıqlarının təmin edilməsi haqqında” Azərbaycan Respublikasının Qanunu və onun tətbiqi ilə bağlı tədbirlər haqqında danışmışdır.
Tədbir səmərəli müzakirələr və təcrübə mübadiləsi şəraitində başa çatmışdır.
V.Məhərrəmov səfər çərçivəsində BMT-nin işgəncələr və digər qəddar, qeyri-insani və ya ləyaqəti alçaldan rəftar və ya cəza məsələləri üzrə xüsusi məruzəçisi X.Mendes, BMT-nin İşgəncələrin qarşısının alınması üzrə Alt Komitəsinin (SPT) sədri M.Evans, İşgəncələrin qarşısının alınması üzrə Assosiasiyasının (APT) baş katibi M.Tomson ilə görüşmüşdür.
Bölmənin digər xəbərləri
