Azərbaycan şirkətləri “Agro-Pack Turkmenistan 2023” sərgi-yarmarkasında təmsil olunacaq
Bakı, 17 noyabr, AZƏRTAC
Azərbaycan şirkətləri “Agro-Pack Turkmenistan 2023” sərgi-yarmarkasında təmsil olunacaq.
AZƏRTAC “Turkmenportal” saytına istinadla xəbər verir ki, “Agro-Pack Turkmenistan 2023” beynəlxalq ərzaq, qablaşdırma və kənd təsərrüfatı məhsulları sərgi-yarmarkasında Rusiya, Almaniya, Hollandiya, Çin, Moldova, Türkiyə, Azərbaycan, İran və Özbəkistandan şirkətlər iştirak edəcək. Sərgi noyabrın 28-dən 30-dək Türkmənistanın Ticarət və Sənaye Palatasında keçiriləcək və “Sofuar” şirkəti ilə birgə təşkil olunacaq.
Sərgidə Hollandiya, Rusiya və İran xüsusi pavilyonlar təqdim edəcəklər.
Əvvəllər “Agro-Pack” sərgiləri Özbəkistan və İraqda keçirilirdi. Türkmənistan ilk dəfədir ki, tədbirə ev sahibliyi edir.
İştirakçılar ərzaq istehsalı üçün avadanlıq, qablaşdırma məhsulları, qida məhsulları və pəhriz əlavələri, çörək istehsalı texnologiyaları, taxıl saxlama və üyütmə üçün avadanlıqlar, istixana becərilməsi, bağçılıq və meşə təsərrüfatı, quşçuluq və heyvandarlıq üçün avadanlıqlar, kənd təsərrüfatı məhsulları, toxum və gübrələr, suvarma sistemləri təqdim edəcəklər.
“Agro-Pack Turkmenistan 2023” kənd təsərrüfatı və qida sənayesində innovasiyalar və tərəfdaşlıqların gücləndirilməsi üçün platforma olacağını vəd edir. İştirakçılar təcrübə mübadiləsi apara, qabaqcıl texnologiyalar təqdim edə və perspektivli biznes əlaqələri qura biləcəklər.
Bölmənin digər xəbərləri
