Azərbaycan və Koreya Respublikasının gəncləri arasında əməkdaşlıq əlaqələri genişlənir
Bakı, 6 iyul (AZƏRTAC). Azərbaycan Respublikası Gənclər və İdman Nazirliyinin beynəlxalq əməkdaşlıq və beynəlxalq qurumlarla iş sektorunun baş məsləhətçisi Mətanət Məmmədovanın başçılıq etdiyi gənclərdən ibarət nümayəndə heyəti Koreya Respublikasında səfərdədir.
Nümayəndə heyətinə Azərbaycan Tələbə Gənclər Təşkilatları İttifaqının (ATGTİ) əməkdaşları da daxildirlər.
ATGTİ-nin mətbuat xidmətindən AZƏRTAC-a bildirmişlər ki, azərbaycanlı gənclər səfərləri çərçivəsində indiyədək Seul və Busan şəhərlərində olmuş, ölkənin tarixi və mədəni abidələrini, muzeylərini ziyarət etmişlər.
Azərbaycanın nümayəndə heyəti, həmçinin Koreyanın dövlət rəsmiləri və gənclər təşkilatlarının rəhbərləri ilə görüşəcəklər. Görüşlərdə hər iki ölkənin gənclər siyasəti və bu istiqamətdə gələcək əməkdaşlıq perspektivləri müzakirə ediləcəkdir.
Səfər iyulun 10-da başa çatacaqdır.
Bölmənin digər xəbərləri
