AZƏRBAYCANDA İDMANIN İNKİŞAFINA BÖYÜK DİQQƏT VƏ QAYĞI GÖSTƏRİLİR
AZƏRTAC xəbər verir ki, Milli Məclisin sədri, Azərbaycan Tennis Federasiyasının (ATF) prezidenti Oqtay Əsədov sentyabrın 3-də ölkəmizdə səfərdə olan Avropa Tennis Assosiasiyasının prezidenti Con Ceyms ilə görüşmüşdür.
Oqtay Əsədov ölkəmizdə idmanın inkişafına xüsusi dövlət qayğısı göstərildiyi, Azərbaycanda idmanın bir çox növləri üzrə dünya çempionatları keçirildiyi barədə ətraflı məlumat vermiş, idmançılarımızın bu yarışlarda, eləcə də olimpiadalarda qazandıqları uğurlardan bəhs etmişdir. Bildirilmişdir ki, son iki Olimpiya oyunlarında idmançılarımız yüksək nəticələr göstərmişlər.
ATF prezidenti demişdir ki, son illər Azərbaycanın ayrı-ayrı bölgələrində müasir olimpiya idman kompleksləri tikilmişdir, bu iş indi də davam etdirilir. Tennis idmanının daha da inkişaf etdirilməsi üçün tennis mərkəzi tikiləcəkdir.
Milli Məclisin sədri Avropa Tennis Assosiasiyasının prezidentinin Azərbaycana səfərinin idmanın bu növünün, eləcə də federasiyalar arasında əlaqələrin inkişafına güclü təkan verəcəyinə ümidvar olduğunu vurğulamışdır.
Avropa Tennis Assosiasiyasının prezidenti Con Ceyms ətraflı məlumata görə minnətdarlığını bildirmiş, Azərbaycan Tennis Federasiyasının prezidenti ilə ötən il Londondakı görüşlərini xatırlamışdır. O, Azərbaycanda idmanın inkişafına göstərilən diqqət və qayğıdan, yeni idman komplekslərinin tikintisindən məmnunluğunu ifadə edərək bildirmişdir ki, Azərbaycanda idmanın inkişafına böyük maraq vardır. Avropa Tennis Assosiasiyasının tennis idmanının inkişafı üçün Azərbaycana hər cür kömək göstərməyə hazırdır.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.
Bölmənin digər xəbərləri
