Azərbaycanda insan alverinə qarşı mübarizədə hüquqi və institusional çərçivə son illərdə ciddi şəkildə möhkəmləndirilib
Bakı, 13 may, AZƏRTAC
Azərbaycanda insan alverinə qarşı mübarizə sahəsində hüquqi və institusional çərçivə son illər ərzində ciddi şəkildə möhkəmləndirilib.
AZƏRTAC xəbər verir ki, bu fikirləri parlamentin İnsan hüquqları komitəsinin sədri Zahid Oruc mayın 13-də Milli Məclisin İnsan hüquqları, Hüquq siyasəti və dövlət quruculuğu komitələrinin birgə iclasında çıxışı zamanı səsləndirib.
O xatırladıb ki, 2005-ci ildə qüvvəyə minmiş “İnsan alverinə qarşı mübarizə haqqında” Qanunda istismarın bir sıra formaları qanunvericilik baxımından müəyyənləşdirilib: “Bunlara məcburi əmək və xidmət, cinsi istismar, köləlik və köləliyə bənzər adətlər, orqan və toxumaların qanunsuz çıxarılması, biotibbi tədqiqatların icazəsiz aparılması, qadının surroqat ana kimi istifadə edilməsi, qanunsuz və cinayətkar fəaliyyətə cəlb olunma və digər istismar növləri daxildir. Bu yanaşma insan alveri problemini yalnız bir aspektlə deyil, çoxşaxəli sosial, tibbi, hüquqi və psixoloji müstəvilərdə qiymətləndirməyə imkan verir”.
Komitə sədri vurğulayıb ki, insan alverinə qarşı mübarizə təkcə hüquq-mühafizə tədbiri kimi deyil, insan hüquqlarının müdafiəsi, sosial ədalət və hüquqi dövlət prinsipinin əsas elementlərindən biri kimi qiymətləndirilməlidir. O, Azərbaycanın bu istiqamətdə göstərdiyi səyləri beynəlxalq təcrübə ilə uzlaşdıraraq hüquq-mühafizə orqanlarının rolunu xüsusi olaraq qeyd edib.
Z.Oruc çıxışında Azərbaycanın təhlükəsizlik və ictimai sabitlik baxımından regionun aparıcı ölkələrindən biri olduğunu vurğulayıb. O, qeyd edib ki, bu sabitliyin formalaşmasında Ümummilli Lider Heydər Əliyevin hüquq-mühafizə orqanlarına göstərdiyi sistemli diqqət və dəstək mühüm rol oynayıb: “Hələ sovet dövründən başlayaraq Ulu Öndərin hüquq-mühafizə sistemində peşəkar kadrların yetişdirilməsi və dövlət idarəçiliyinin formalaşdırılması istiqamətində atdığı addımlar bu gün də öz nəticəsini verməkdədir”.
Komitə sədri, həmçinin vurğulayıb ki, Prezident İlham Əliyev Ulu Öndərin bu sahədə qoyduğu xətti davam etdirərək hüquq-mühafizə orqanlarının, o cümlədən Daxili İşlər Nazirliyinin modernləşdirilməsi və imkanlarının genişləndirilməsi üçün ardıcıl islahatlar həyata keçirir. Polis orqanları təkcə daxili təhlükəsizliyin təminatçısı kimi deyil, həm də ölkənin ərazi bütövlüyü uğrunda aparılan mübarizədə, o cümlədən İkinci Qarabağ müharibəsində mühüm rol oynayıb. Müharibə zamanı 66 polis əməkdaşının şəhid olması, 346 nəfərin yaralanması, 1400 nəfərə müxtəlif mükafatların verilməsi və 4 nəfərin Vətən Müharibəsi Qəhrəmanı adına layiq görülməsi bu xidmətlərin bariz göstəricisidir.
Zahid Oruc çıxışında bəzi xarici media qurumlarının və onların siyasi sifarişçilərinin hüquq-mühafizə orqanlarının nüfuzunu hədəfə alaraq dövlət-polis-cəmiyyət münasibətlərini pozmağa yönəlmiş cəhdlərini də qınayıb. O, belə təşəbbüslərin Azərbaycanın Ermənistan üzərində əldə etdiyi hərbi və siyasi qələbəni gözdən salmağa yönəldiyini qeyd edərək bu cür təxribatların qarşısının hüquqi və informasiya sahəsində ardıcıl şəkildə alınacağını vurğulayıb.
Bildirilib ki, insan alverinə qarşı mübarizədə qanunvericilik aktlarının təkmilləşdirilməsi, cəmiyyətin maarifləndirilməsi, beynəlxalq əməkdaşlığın gücləndirilməsi və institusional resursların davamlı olaraq artırılması əsas prioritetlər sırasında qalmalıdır.
Bölmənin digər xəbərləri
