AZƏRBAYCANDA ÖTƏN DÖRD AYDA ƏMTƏƏ DÖVRİYYƏSİNİN HƏCMİ 14,7 FAİZ ARTMIŞDIR
Dövlət Statistika Komitəsindən AZƏRTAC-a bildirmişlər ki, dörd ayda Azərbaycan üzrə pərakəndə əmtəə dövriyyəsinin həcmi ötən ilin eyni dövrünün göstəricisini 14,7 faiz üstələyərək 3 milyard 185,3 milyon manat olmuşdur. Dövriyyənin 15,6 faizi hüquqi şəxslərin, 45,9 faizi mütəşəkkil təşkil olunmuş yarmarka və bazarlarda fəaliyyət göstərən fiziki şəxslərin, 38,5 faizi isə hüquqi şəxs yaratmadan ticarətlə məşğul olan fərdi sahibkarların fəaliyyəti hesabına formalaşmışdır.
Hesabat dövründə ticarət şəbəkələrindən əhaliyə 2 milyard 73 milyon manatlıq ərzaq, 1 milyard 112,3 milyon manatlıq qeyri-ərzaq malları satılmışdır. Bu, ötən ilin eyni dövründəkindən, müvafiq olaraq, 10,8 və 25 faiz çoxdur.
Yanvar-aprel aylarında əhaliyə 898,1 milyon manatlıq və ya 29,6 faiz çox pullu xidmət göstərilmişdir. Xidmətin 79 faizi hüquqi, 21 faizi fiziki şəxslərin payına düşmüşdür. Onlar əhaliyə, müvafiq olaraq, 36,6 və 8,6 faiz çox pullu xidmət göstərmişlər.
Bölmənin digər xəbərləri
