AZƏRBAYCANDA SÜLH HƏRƏKATININ FORMALAŞDIRILMASI İLƏ BAĞLI MƏSƏLƏLƏR MÜZAKİRƏ OLUNMUŞDUR
Azərbaycan Respublikasının insan hüquqları üzrə müvəkkili Elmira Süleymanova “Azərbaycanda sülh hərəkatının formalaşdırılması: problemlər, perspektivlər” mövzusunda dəyirmi masa keçirmişdir.Tədbirdə Milli Məclisin deputatları, dövlət orqanlarının, beynəlxalq təşkilatların, BMT-nin ictimaiyyətlə əlaqələr departamentinin və qeyri-hökumət təşkilatlarının nümayəndələri iştirak etmişlər.
Ombudsman Aparatından AZƏRTAC-a bildirmişlər ki, E.Süleymanova 21 sentyabr - Beynəlxalq Sülh gününün BMT-nin dəstəyi ilə dünya miqyasında qeyd edilməsini yüksək qiymətləndirmişdir. Müvəkkil Ermənistanın Azərbaycana təcavüzünün nəticələri barədə danışmış, bu gün nüfuzlu beynəlxalq təşkilatların diqqət və səylərinin Dağlıq Qarabağ münaqişəsinin həllinə yönəldilməsinin zəruriliyini qeyd etmişdir.
E.Süleymanova sülhyaratma proseslərində qadınların, gənclərin, uşaqların iştirakına dəstək verdiyini söyləmiş, dünyada sülhü qoruyub saxlamaq, xalqların rifahını yüksəltmək istiqamətində səylərin birləşdirilməsinin əhəmiyyətini vurğulamışdır.
Dəyirmi masa iştirakçıları ölkəmizdə sülh hərəkatının formalaşdırılması, din vasitəsilə sülh mədəniyyəti, bu sahədə milli-dini tolerantlığın rolu və digər məsələlər ətrafında müzakirələr aparmışlar.
Bölmənin digər xəbərləri
