Azərbaycanı təmsil edən çapar: Britaniyada Azərbaycan bayrağını dalğalandırmaq böyük qürurdur VİDEO
Vindzor, 16 may, AZƏRTAC
Heydər Əliyev Fondunun dəstəyi və Azərbaycan Atçılıq Federasiyasının (ARAF) təşkilatçılığı ilə Böyük Britaniyada keçirilən ənənəvi “Vindzor Kral Atçılıq Şousu- 2025”də ölkəmiz ilk dəfə 130 nəfərlik nümayəndə heyəti ilə təmsil olunur.
Nümayəndə heyətinin üzvlərindən biri, gənc çapar Elvina Valeşeva AZƏRTAC-a müsahibəsində bildirib ki, bu tədbirdə Azərbaycanı təmsil etmək onun üçün böyük qürur hissidir.
“Britaniyada Azərbaycan bayrağını dalğalandırmaq bizim üçün böyük qürurdur. Bu səfər zamanı “Azerbaijan - Land of Fire” adlı şou-kompozisiyada çıxış edəcəyik. Proqramda canlı orkestr olduğu üçün daha çox həyəcan hiss edirik”,- deyə o bildirib.
Elvina Valeşeva qeyd edib ki, çıxışında üç fərqli hərəkət nümayiş etdirəcək: “Onlardan biri iki atın arasında şpaqat açmaqdır. Bu, mənim üçün həm məsuliyyətli, həm də həyəcanverici andır”, – deyə o vurğulayıb.
Elvina əlavə edib ki, Vindzordakı çıxışdan sonra mayın 22–25-də Türkiyədə keçiriləcək növbəti beynəlxalq tədbirdə də Azərbaycanı təmsil edəcək.
“Azerbaijan – Land of Fire” şou-kompozisiyası Qarabağ atlarının gözqamaşdırıcı nümayişi, istedadlı rəqqasların çıxışı və yeni orkestr qrupunun müşayiəti ilə təqdim olunub. Kompozisiyanın əsasını Vindzor tamaşaçılarına yaxşı tanış olan, çılğınlığı və gözəlliyi ilə seçilən Qarabağ atları, zərif Azərbaycan rəqsləri və ecazkar milli musiqimiz təşkil edib.
“Vindzor Kral Atçılıq Şousu – 2025” mayın 15-dən 18-dək Vindzor şəhərində yerləşən eyniadlı tarixi qəsrin ərazisində keçirilir. Tədbirdə dünyanın müxtəlif ölkələrindən nümayəndələr iştirak edirlər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
