Tallinn, 23 avqust (AZƏRTAC). Estoniyada fəaliyyət göstərən “Lira” Milli Azlıqlar Birliyi Tallinn şəhəri meriyasının və Pıxya-Tallinn rayonu hökumətinin dəstəyi ilə sentyabrın 8-də “Kotka” stadionunda milli azlıqların nümayəndələrindən ibarət komandalar arasında 15-ci futbol turniri keçirəcəkdir.

İlkin məlumata görə, turnirdə Azərbaycanın “Neftçi”, Gürcüstanın “Samşoblo”, Polşanın “Polonia” komandaları, habelə Ukrayna, Belarus cəmiyyətlərinin və digər cəmiyyətlərin komandaları iştirak edəcəklər.

Turnir çərçivəsində iki taymdan ibarət mini-futbol, futbol bulliti (cərimə zərbəsi) və penalti yarışları keçiriləcəkdir.

“Lira” Milli Azlıqlar Cəmiyyətinin sədri Lidiya Kılvart və Tallinn şəhərinin vitse-meri Mixail Kılvart ilk üç yeri tutan komandalara kuboklar və xatirə hədiyyələri, habelə pul mükafatları təqdim edəcəklər.

Nigar Cəfərova

AZƏRTAC-ın xüsusi müxbiri

Tallinn