Azərbaycanın Respublika Günü və diplomatik xidmət orqanlarının 100 illiyi Türkmənistanda da qeyd edilib
Aşqabad, 29 may, АZƏRTAC
Azərbaycanın Türkmənistandakı səfirliyi tərəfindən Respublika günü və Diplomatik xidmət orqanlarının 100 illik yubileyi münasibətilə təntənəli rəsmi qəbul keçirilib.
AZƏRTAC xəbər verir ki, tədbirdə Türkmənistan Nazirlər Kabinetinin sədr müavini Bahargül Abdıyeva, Türkmənistan ictimaiyyətinin nümayəndələri, ölkədə fəaliyyət göstərən xarici ölkə və beynəlxalq təşkilatların diplomatik nümayəndəliklərinin rəhbərləri və bu ölkədə yaşayan soydaşlarımız iştirak ediblər.
Əvvəlcə Azərbaycanın və Türkmənistanın dövlət himnlərinin səsləndirilib.
Daha sonra Azərbaycanın Türkmənistandakı səfiri Həsən Zeynalov 1918-ci ildə elan olunan Azərbaycan Xalq Cümhuriyyəti ilə bağlı məlumat verib. O deyib ki, XX əsrin əvvəllərində dünyadakı geosiyasi vəziyyətin mürəkkəbliyinə baxmayaraq, Xalq Cümhuriyyəti tezliklə dünya ictimaiyyəti tərəfindən tanındı. Cümhuriyyət tərəfindən həyata keçirilən islahatlar həmin dövr üçün inqilabi addımlar hesab olunur. Qadınların səs vermək hüququnun təmin olunması, milli, siyasi və ya dini mənsubiyyətindən asılı olmayaraq bütün vətəndaşlar üçün bərabər hüquqların verilməsi həmin dövrü qabaqlayan islahatlardır. Xalq Cümhuriyyəti 23 ay yaşamasına baxmayaraq, Azərbaycan xalqının demokratik prinsiplərə əsaslanan öz milli dövlətini qurmaq qabiliyyətini sübut etdi.
Həsən Zeynalov qeyd edib ki, 1991-ci ildə müstəqilliyini bərpa edən müasir Azərbaycan Respublikası siyasi, hüquqi və mənəvi varisi olduğu Cümhuriyyətin dövlət rəmzlərini qəbul etdi. Xalqımızın ümummilli lideri Heydər Əliyevin hakimiyyətə qayıdışından sonra ölkəmizin inkişaf mərhələsinə qədəm qoyduğunu söyləyən səfir deyib: “Məhz təcrübəli dövlət xadimi Heydər Əliyevin rəhbərliyi altında Azərbaycanda güclü dövlət, demokratik vətəndaş cəmiyyəti və bazar iqtisadiyyatı yaradıldı, ölkəmizdə bütün sahələrdə ciddi islahatlar həyata keçirildi. Azərbaycan qısa müddət ərzində böyük uğurlara imza atdı. Ulu öndər Heydər Əliyev siyasətini uğurla davam etdirən Prezident İlham Əliyev Azərbaycanın beynəlxalq aləmdəki mövqeyini daha da möhkəmləndirdi və ölkəmizin müstəqilliyini əbədi və dönməz etdi”.
Bu gün Azərbaycanın qlobal enerji və nəqliyyat layihələrinin əsas təşəbbüskarı və fəal iştirakçısı olduğunu deyən səfir aparıcı beynəlxalq təşkilatların ölkəmizin iqtisadi göstəricilərini yüksək qiymətləndirdiklərini qeyd edib.
Ermənistan-Azərbaycan Dağlıq Qarabağ münaqişəsi ilə bağlı məlumat verən səfir Azərbaycanın münaqişənin sülh yolu ilə, ölkəmizin beynəlxalq səviyyədə tanınmış sərhədləri çərçivəsində, beynəlxalq hüququn normaları və prinsipləri əsasında həllinin tərəfdarı olduğunu vurğulayıb.
Azərbaycan-Türkmənistan münasibətlərindən bəhs edən səfir iki ölkə arasında əlaqələrin yüksək səviyyədə olduğunu bildirib. Səfir yüksəksəviyyəli qarşılıqlı səfərlərin, imzalanan sənədlərin, xüsusilə “Azərbaycan Respublikası ilə Türkmənistan arasında Strateji Əməkdaşlıq haqqında Bəyannamə”nin əməkdaşlığımızın genişləndirilməsində mühüm rol oynadığını ifadə edib.
Daha sonra çıxış edən Türkmənistan Nazirlər Kabinetinin sədr müavini Bahargül Abdıyeva Türkmənistan Prezidenti Qurbanqulu Berdiməhəmmədovun adından qardaş Azərbaycan xalqını Respublika Günü münasibətilə təbrik edib.
B.Abdıyeva bu bayramın Azərbaycan xalqı üçün tarixi əhəmiyyətindən, Azərbaycanın müasir dövlətçiliyinin formalaşmasında bu tarixin xüsusi rolundan bəhs edib.
Türkmənistanın və Azərbaycanın həm ikitərəfli, həm də çoxtərəfli əsasda yaxşı əlaqələrə malik olduğunu söyləyən sədr müavini ölkələrimizin nüfuzlu beynəlxalq təşkilatlarda sıx əməkdaşlıq etdiklərini bildirib. O, ölkəsinin Azərbaycanla qarşılıqlı maraqlara cavab verən faydalı əməkdaşlığın dərinləşməsinə və inkişafına xüsusi önəm verdiyini diqqətə çatdırıb.
B.Abdıyeva illər ərzində ölkələrimiz arasında siyasi, diplomatik, ticarət, iqtisadi, mədəni və humanitar sahələrdə güclü əməkdaşlıq əlaqələrinin qurulduğunu deyib. İki ölkə hökumətlərinin sıx əməkdaşlığı nəticəsində bu gün Türkmənistanda birgə mədəni tədbirlərin keçirildiyini bildirən B.Abdıyeva təşkil olunan sərgilərin, konsertlərin, xalqlarımızın dostluğunun möhkəmləndirilməsinə və qonşu dövlətlərimizin əlaqələrinin yeni məzmunlarla zənginləşdirilməsinə xidmət etdiyini vurğulayıb.
Çıxışlardan sonra tədbir ziyafətlə davam etdirilib.
Ziyafətdə Azərbaycandan gəlmiş incəsənət xadimləri milli musiqi nümunələri ilə çıxış ediblər. İncəsənət xadimlərinin çıxışları böyük rəğbətlə qarşılandı.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
