Azərbaycanla Finlandiya arasında arxiv işi üzrə konkret sahələrdə əməkdaşlığın perspektivləri müzakirə olunub
Bakı, 2 noyabr, AZƏRTAC
Noyabrın 2-də Finlandiyanın Azərbaycandakı səfiri xanım Kirsti Narine Milli Arxiv İdarəsində olub.
Milli Arxiv İdarəsindən AZƏRTAC-a bildirilib ki, səfirliyin təşəbbüsü ilə keçirilən görüş zamanı İdarənin rəisi Əsgər Rəsulov Finlandiya ilə Azərbaycan arasında siyasi, iqtisadi, mədəni əlaqələrin, o cümlədən arxiv işi sahəsində mövcud əlaqələrin çox surətlə inkişaf etdiyini bildirib, arxivlərimiz arasında qarşılıqlı təcrübə mübadiləsi proqramlarının icrasını məmnunluqla qeyd edib.
Azərbaycan arxivləri ilə əlaqələrin davamlı xarakter alması, təcrübə mübadiləsi məsələlərinin həllinin hər iki ölkənin müvafiq strukturlarının gələcək fəaliyyətində önəmli rol oynayacağını bildirən xanım diplomat, əməkdaşlığın genişləndirilməsinin vacibliyini vurğulayıb.
Sonra hər iki ölkənin Milli Arxiv idarələri arasında əməkdaşlıq istiqamətlərinin daha da genişləndirilməsi, birgə layihələrin reallaşdırılması, təcrübə mübadiləsi məsələləri müzakirə olunub.
Görüşdə, həmçinin arxiv işi üzrə konkret sahələrdə əməkdaşlığın perspektivləri, beynəlxalq tendensiyalar və qarşılıqlı maraq doğuran digər məsələlər barədə də fikir mübadiləsi aparılıb.
Bölmənin digər xəbərləri
