Bakı, 17 yanvar (AZƏRTAC). “Bakcell” MMC nömrələrin köçürülməsi xidmətinin (MNP - Mobile Number Portability) tətbiqinə hazırlaşır. Yeni yığım metodu Rabitə və İnformasiya Texnologiyaları Nazirliyinin qərarına uyğun yanvarın 21-dən tətbiq olunacaqdır.

Şirkətdən AZƏRTAC-a bildirmişlər ki, “Bakcell” nömrələrindən zəng vurarkən abonent nömrəsindən əvvəl “055” prefiksinin (nümunə “055” XXX-XX-XX) yığılması vacibdir.

Yeni yığım metodu digər mobil rabitə operatorlarının (Azercell – “050” və “051”, Azerfon – “070” və “077”) şəbəkələrində də tətbiq olunacaqdır.

MNP xidməti operatora ayrılan prefikslə birlikdə (050, 051, 055, 070 və 077) abonent nömrəsinin tam miqrasiyasını nəzərdə tutur. Abonentlər operatorları dəyişəcəyi təqdirdə telefon nömrələrini saxlamaq imkanı qazanacaqlar.