Bakı, 17 aprel (AZƏRTAC). Aprelin 17-də Bakı Dövlət Universitetində (BDU) Türkiyə və azərbaycanlı hüquqşünasların müəllifi olduqları “Türk-Azərbaycan hüquq lüğəti”nin təqdimatı olmuşdur.

AZƏRTAC xəbər verir ki, tədbirdə BDU-nun rektoru, Milli Məclisin deputatı, akademik Abel Məhərrəmov Türkiyə və Azərbaycan arasında qardaşlıq və dostluq münasibətlərindən söhbət açmışdır. Bildirmişdir ki, Türkiyə ilə Azərbaycan arasında qarşılıqlı əməkdaşlıq münasibətləri getdikcə daha geniş və hərtərəfli inkişaf edir. Hər iki dövlət arasında müxtəlif sahələrdə olduğu kimi elm və təhsil sahəsində də hər zaman uğurlu addımlar atılmışdır. Diqqətə çatdırmışdır ki, bu gün Türkiyə Ədliyyə Akademiyası idarə heyətinin üzvü, Yüksek Seçim Kurulu başkanı Sadi Güvenin rəhbərliyi ilə nümayəndə heyəti universitetimizin qonağıdır. Məqsəd “Türk-Azərbaycan hüquq lüğəti”nin təqdimat mərasimində iştirak etməkdir. Bu kitab Türkiyə və azərbaycanlı hüquqşünasların birgə əməyinin məhsuludur.

Kitabın yazılma tarixi haqqında məlumat verən rektor bildirmişdir ki, 2012-ci ildə Türkiyə Ədliyyə Akademiyasının rektoru Hüseyn İldırım BDU-nun hüquq fakültəsində olmuşdur. Görüş zamanı iki qardaş ölkənin hüquq sahəsində müxtəlif qarşılıqlı əməkdaşlıq münasibətlərinin inkişafı haqqında müzakirələr aparılmışdır. Nəticədə hüquq sahəsində birgə lüğətin hazırlanması nəzərdə tutulmuşdur.

BDU Ankara Universiteti ilə hüquq sahəsində ikili diplom istiqamətində təhsil proqramı həyata keçirir. Ümidvaram ki, lüğət həm də bu sahədə təhsil alan tələbələrə yardımçı olacaqdır.

A.Məhərrəmov bildirmişdir ki, lüğət Türkiyə Ədliyyə Akademiyasının hakim üzvü, professor Ejder Yılmazın rəhbərliyi ilə azərbaycanlı alimlər tərəfindən tərtib olunmuşdur. Kitabın elmi redaktoru BDU-nun hüquq fakültəsinin dekanı, professor Əmir Əliyevdir.

Tədbirdə Sadi Güven, professor Ejder Yılmaz kitabın əhəmiyyətindən söhbət açaraq müəlliflərə minnətdarlıqlarını bildirmişlər. E.Yılmaz ümummilli lider Heydər Əliyevin “Biz bir millət, iki dövlətik” kəlamını xatırladaraq gələcəkdə bütün sahələrdə olduğu kimi elm, təhsil sahəsində də iki qardaş ölkə arasında əlaqələrin daha da inkişaf edəcəyini əminliklə vurğulamışdır.

Tədbirdə kitabın elmi redaktoru, professor Əmir Əliyev Türkiyə ilə Azərbaycan arasında elm və təhsil sahəsində qarşılıqlı əlaqələrdən danışmış, lüğətin hüquq sahəsində ikili diplom proqramı üzrə təhsil alan tələbələr üçün faydalı olacağını bildirmişdir.

Sonda qonaqlara xatirə hədiyyələri təqdim olunmuşdur.

Qeyd edək ki, lüğətin müəllifləri Fərhad Mehdiyev, Sərvər Süleymanlı, Mübariz Yolçuyev, Elçin Xələfov və İsmayıl İsmayıllıdır.