Bakı-Ələt-Qazax-Gürcüstan ilə dövlət sərhədi magistral yolunun müasir səviyyədə qurulması Azərbaycanın beynəlxalq nəqliyyat daşımalarında rolunu gücləndirir
Yevlax, 24 iyun, Vüsalə Cənnətova, AZƏRTAC
Bakı-Ələt-Qazax-Gürcüstan ilə dövlət sərhədi magistral yolunun Yevlax şəhərindən keçən hissəsində yeraltı piyada keçidinin, səkilərin, həmçinin magistral yola avtomobillərin ikiistiqamətli giriş-çıxışını təmin edən yanaşma yollarının tikinti işləri başa çatmaq üzrədir.
Azərbaycan Avtomobil Yolları Dövlət Agentliyinin mühəndisi Mahir Babayevin AZƏRTAC-ın bölgə müxbirinə verdiyi məlumata görə, piyada keçidinin ümumi uzunluğu 48 metr olacaq ki, onun da 37 metri qapalı hissədir. Eni 7 metr olan yanaşma yollarının ümumi uzunluğu isə 3,2 kilometrdir.
"Piyada keçidinin bir hissəsinin dəmir-beton işləri yekunlaşmaq üzrədir. Yanaşma yolları ilə bağlı işlərin 90 faizi yerinə yetirilib, son tamamlama işləri aparılır", - deyə Mahir Babayev vurğulayıb.
Bakı-Ələt-Qazax-Gürcüstan ilə dövlət sərhədi magistral avtomobil yolu beynəlxalq nəqliyyat dəhlizinin Azərbaycandan keçən tərkib hissəsidir. Bu yolun müasir səviyyədə qurulması Şərq-Qərb və Şimal-Cənub nəqliyyat dəhlizlərinin kəsişməsində yerləşən Azərbaycanın beynəlxalq nəqliyyat daşımalarında rolunu daha da gücləndirir.
Xatırladaq ki, iyunun 23-də Prezident İlham Əliyev Bakı-Ələt-Qazax-Gürcüstan ilə dövlət sərhədi magistral yolunun Yevlax şəhərindən keçən hissəsində görülən işlərlə tanış olub.
Bölmənin digər xəbərləri
