Bakı, 17 sentyabr, AZƏRTAC

Bakı-Sumqayıt marşrutunda gediş haqqı qonşu ölkələrin dəmir yolunda müvafiq tarıf qiymətləri ilə müqayisədə xeyli ucuzdur. Bunu AZƏRTAC-a “Azərbaycan Dəmir Yolları” Qapalı Səhmdar Cəmiyyətindən bildiriblər.

Məlum olduğu kimi, sentyabr ayının 12-də Bakı-Sumqayıt marşrutu ilə ikimərtəbəli elektrik qatarları hərəkətə başlayıb.

Sentyabr ayının 15-dən etibarən Bakı-Sumqayıt marşrutu ilə hərəkət edən elektrik qatarlarının hərəkət cədvəli qüvvəyə minib.

Azərbaycan Respublikası Tarif (qiymət) Şurasının müvafiq qərarı ilə Bakı sərnişin stansiyasından Sumqayıt sərnişin stansiyasınadək gediş haqqı 80 qəpik, aralıq stansiyalar üzrə isə şəhərdaxili və şəhərətrafı alternativ nəqliyyat vasitələri ilə sərnişindaşıma tarifləri və stansiyalararası məsafə nəzərə alınmaqla 20-70 qəpik arasında təsdiq edilib. Yeni tariflər bu il sentyabrın 15-dən qüvvəyə minib.

“Azərbaycan Dəmir Yolları” QSC-dən bildiriblər ki, Tarıf Şurasının qərarı olduqca ədalətlidir. Çünki təyin olunan qiymətlər qonşu ölkələrin müvafiq tarıf qiymətləri ilə müqayisədə xeyli ucuzdur. Məsələn, Rusiya Federasiyasında fəaliyyət göstərən “Aeroekspress”də 45 kilometrlik məsafədə gediş haqqı 6,30 AZN, Estoniyada şəhərətrafı elektrik qatarlarında 35,9 kilometrlik məsafədə gediş haqqı 3,35 AZN, Ukraynada şəhərətrafı elektrik qatarlarında 37 kilometrlik məsafədə gediş haqqı 2, 0 AZN, Özbəkistan Respublikasında şəhərətrafı elektrik qatarlarında gediş haqqı 2,50 AZN, Türkiyə Respublikasında 46 kilometrlik məsafədə gediş haqqı 5,20 AZN, Qazaxıstan Respublikasında şəhərətrafı elektrik qatarlarında gediş haqqı 6,10 AZN təşkil edir.

MUQAYİSƏLİ CƏDVƏL

Rusiya Federasiyası

“Aeroekspress 45-30 km 6, 30 AZN

Estoniya 35,9 km 3, 35 AZN

Ukrayna 37 km 2, 90 AZN

Özbəkistan Şəhərətrafı elektrik qatarları 2, 50 AZN

Türkiyə 46 km 5, 20 AZN

Qazaxıstan Şəhərətrafı elektrik qatarları 6, 10 AZN

Azərbaycan 42 km 0.80 AZN