Bakıda İspaniyanın “Barselona” futbol klubunun rəsmi düşərgəsi fəaliyyətə başlayıb
Bakı, 17 noyabr, AZƏRTAC
Noyabrın 17-də Bakıda, “İnter Arena” stadionunda ölkəmizdə ilk dəfə olaraq İspaniyanın məşhur “Barselona” futbol klubunun rəsmi düşərgəsi fəaliyyətə başlayıb.
AZƏRTAC xəbər verir ki, “İnter Arena” stadionunda keçirilən açılış mərasimində “Azerbaijan Consulting Group” (ACG) şirkətinin nümayəndəsi Ruslan Abbasov və “Barselona” Futbol Klubu Akademiyasının əlaqələndiricisi Fredi Martin düşərgə haqqında məlumat veriblər. Bildirilib ki, düşərgə Bakının “İnter” futbol klubunun nəzdində fəaliyyət göstərəcək. Noyabrın 17-dən dekabrın 12-dək təşkil olunacaq düşərgədə fiziki hazırlığından asılı olmayaraq, 6-16 yaşlarında istənilən uşaq iştirak edə bilər. Düşərgə azərbaycanlı gənc futbol həvəskarlarına “Barselona”nın yeniyetmələrdən ibarət komandalarında tətbiq olunan bacarıq və taktikaları, eləcə də klubun futbol modelini öyrənmək imkanı yaradacaq. Dörd qrupda toplanacaq uşaqlara ikihəftəlik təlimlər keçiləcək. “Barselona”nın düşərgəsi “Azerbaijan Consulting Group” (ACG) tərəfindən təşkil olunur.
Qeyd edilib ki, düşərgədə qeydiyyatdan keçən uşaqlar məşqlərdə iştirak edəcək, futbolun texnikasına yiyələnəcəklər. Düşərgə əsasən, məktəbli oğlan və qızların birgə təlimi üçün nəzərdə tutulub. Burada çalışan məşqçilər nəinki uşaqların bacarıqlarına, həmçinin gigiyena və pəhriz vərdişlərinin formalaşmasına və nəzarətdə saxlanılmasına çalışacaqlar. Düşərgənin əsas məqsədləri “Barselona” futbol klubunun təmsil etdiyi mühüm dəyərləri uşaqlara öyrətməkdir.
Tədbirdə bu layihənin Azərbaycanda futbolun inkişafına mühüm töhfə verəcəyi vurğulanıb.
Düşərgədə məşqlər Fredi Martin və məşqçilər Sergi Pi ilə Andreu Cerarols tərəfindən aparılacaq. UEFA lisenziyalı bu məşqçilərin bu sahədə 15 ildən artıq təcrübəsi, eləcə də futbol üzrə magistr dərəcələri var. Onlar, həmçinin “Barselona”nın futbol düşərgələrinin texniki direktorlarıdır.
Bölmənin digər xəbərləri
