8 Mart - Beynəlxalq Qadınlar Günündə fəaliyyətə başlayan yarmarka metronun “Gənclik” stansiyasının çıxışında açılıb

Bakı, 8 mart, AZƏRTAC

Novruz bayramı ilə əlaqədar olaraq martın 8-dən 19-dək Kənd Təsərrüfatı Nazirliyinin (KTN) tabeliyindəki “Aqrar Tədarük və Təchizat” ASC “Kənddən şəhərə” Novruz yarmarkası təşkil edib. 8 Mart - Beynəlxalq Qadınlar Günündə fəaliyyətə başlayan yarmarka paytaxtın Nərimanov rayonu, Fətəli xan Xoyski küçəsi, 5 (metronun “Gənclik” stansiyasının çıxışı) ünvanında açılıb. Yarmarkada Novruz bayramının əsas personajları sayılan Kosa və Keçəl qadın alıcı və satıcılara gül bağışlayaraq onların bayramlarını təbrik edirdilər. Onlar yarmarkaya üz tutanlara əsl bayram əhval-ruhiyyəsi yaşadırdılar. Uşaqların əylənməsi üçün yarmarkada xüsusi guşə də yaradılmışdı. Həftəsonu, səhər saatları olmasına baxmayaraq, şəhər sakinləri hər bir azərbaycanlının bayram süfrəsini bəzəyən məhsullardan almaq üçün yarmarkaya axışırdırlar. Buna səbəb məhsulların qiymətinin bazardan xeyli ucuz olmasıdır.

On iki gün davam edəcək yarmarkada ümumilikdə 20-dən çox regiondan fermerlər iştirak edirlər. Burada 150-dən çox çeşiddə kənd təsərrüfatı və qida məhsullarının satışı həyata keçirilir.

Gündəlik keçiriləcək yarmarkanın əsas üstünlüklərindən biri məhsulların fermerlərin özləri tərəfindən birbaşa olaraq satışa çıxarılmasıdır.

On iki gün fasiləsiz davam edəcək yarmarkanın təşkilində əsas məqsəd bayram günlərində vətəndaşların kənd məhsullarına artan tələbatlarını yerli və sağlam məhsullarla təmin etmək, yerli fermer təsərrüfatları üçün alternativ satış kanalı yaratmaqdır.

Vətəndaşlar Novruz yarmarkasından kənd təsərrüfatı məhsullarını sərfəli qiymətə elə fermerlərin özündən almaq imkanı əldə ediblər.

AZƏRTAC-ın əməkdaşları yarmarkada olub və alış-satış prosesini yaxından izləyiblər.

Qadın alıcılardan biri deyib ki, ilk növbədə bu gün qadınların bayramıdır. Novruz yarmarkası məhz Beynəlxalq Qadınlar Günündə açılıb. Biz qadınlara bu çox xoş sürpriz oldu ki, bayramla bağlı gül də hədiyyə etdilər. Odur ki, qadınlarımızı da təbrik edirəm. Eləcə də hamını qarşıdan gələn Novruz bayram münasibətilə də təbrik edirəm. Qiymətlərə gəlincə, deyərdim ki, münasib və sərfəlidir. Fermerlər rayonlardan təzə məhsullar, meyvələr gətiriblər. İstərdik ki, hamı gəlib bayram alış-verişini buradan etsin. Mən özüm evim üçün bütün meyvələri bu yarmarkadan almışam. Qiymətlər də məni tam qane etdi.

Söhbət etdiyimiz İsmayıllı rayonundan gələn satıcılardan biri məhsullarının satışı üçün yaradılan şəraitdən razılığını bildirərək vurğuladı ki, yarmarkada fermerlər üçün çəkilən bütün xərclər dövlət tərəfindən ödənir. Yarmarkada piştaxtalar, önlüklər və tərəzi hamısı dövlət tərəfindən verilir. Öz məhsullarımıza gəlincə, burada qiymətlər bazarlarla və marketlərlə müqayisədə ucuzdur. Buna görə biz fermerlərə belə gözəl şərait yaratdıqları üçün “Aqrar Tədarük və Təchizat” ASC-yə minnətdarlığımızı bildiririk.

Qeyd edək ki, “Kənddən şəhərə” Novruz yarmarkasında satışa çıxarılan məhsullar yarmarkada iştirak üçün əvvəlcədən qeydiyyatdan keçmiş fermerlər tərəfindən alıcılara təqdim olunur. Həmin fermerlər ödənişsiz piştaxta, tərəzi, soyuducu və digər ləvazimat və avadanlıqlarla tam təchiz olunmaqla məhsullarını şəhər sakinlərinə təqdim edirlər.

Məhsulların keyfiyyətinə nəzarət etmək məqsədilə yarmarkada Azərbaycan Qida Təhlükəsizliyi Agentliyinin Səyyar Qida Laboratoriyası fəaliyyət göstərir. Yarmarkada satışa çıxarılan hər hansı məhsulun keyfiyyət göstəricilərini öyrənmək üçün vətəndaşlar laboratoriyanın xidmətlərindən də faydalana bilərlər.