Bakıda müasirliklə tarixin qovuşduğu istirahət məkanı – Ərazisi genişləndirilən Mərkəzi Parkdan REPORTAJ
Bakı, 8 avqust, AZƏRTAC
Metronun “Nizami” stansiyasından Azərbaycan Dövlət Dram Teatrına gedən yol bitər-bitməz qarşımızda Mərkəzi Parkın gözoxşayan mənzərəsi açılır. Parkın girişində Bakının Baş Planına uyğun olaraq, layihələndirilməsi və ərazisində yerləşən məkanlar barədə məlumat guşəsi qoyulub. Burada uşaq meydançaları, istirahət güşələri, ictimai məkanların istiqamətləri göstərilib.
Heç inanmaq olmur ki, 7-8 il bundan əvvəl “Sovetski” adlanan bu ərazidə dar küçə və dalanlar, köhnə, şəraitsiz evlər olub. İndi parkda skuter, skeyt sürən uşaq və yeniyetmələr çoxdur. Burada onların asudə vaxtlarını səmərəli keçirmələri üçün xüsusi yer ayrılıb. Parkda ağacların altında və yaşıllıq zonalarında istirahət edən çox sayda insan var. Söhbətgahlarda əyləşən şəhər sakinləri və turistlər Bakı küləyinin sərinliyindən zövq alır, günün yorğunluğunu çıxarmağa çalışırlar. Parkda əkilən ağacların və digər bitkilərin məxsusi qoxusu isə hər kəsi cəlb edir.
Qeyd olunanlar AZƏRTAC-ın əməkdaşlarının ərazisinin növbəti dəfə genişləndirilməsi nəzərdə tutulan Mərkəzi Parkda müşahidə etdiklərinin bir hissəsidir. Aparılan müşahidə və söhbətlər zamanı məlum olub ki, paytaxt sakinləri və turistlər parkda yaradılan şəraitdən çox razıdırlar. Onlar parkın daha da genişləndirilməsinin məqsədəuyğun olduğunu deyiblər.
Bakı sakini Sevda Hüseynova Mərkəzi Parkın möhtəşəm olduğunu bildirib: “Böyük şəhərlərdə mütləq yaşıllıq zonaları olmalıdır. Burada yaşıllıqlar çoxdur. İşdən sonra gəlib, parkda gəzirik, dincəlirik. Bir vətəndaş olaraq burada parkın salınmasına görə dövlətimizin başçısına sonsuz minnətdarlığımı bildirirəm. Mərkəzi Parkda insanlar yaxşı istirahət edir, dincəlirlər. Vətəndaşlarımız bu parkı qorumalıdırlar”.
Bakıya qonaq gələn Əhməd Abdullayev Mərkəzi Parkda istirahət etməkdən zövq aldığını dilə gətirib: “Rayondan gəlmişik, burada istirahət üçün hər cür şərait yaradılıb. Havası da yaxşıdır, ətraf yaşıllıqdır. Oturacaqlar, su hövzələri, fantanlar var. Park təmizdir, obyektlər əhalinin xidmətindədir. Buraya dincəlmək üçün gəlirik. Bu ərazi vaxtilə bərbad vəziyyətdə olub. İndi gözəl park yaradılıb”.
Qeyd edək ki, geniş yaşıllıq zolaqla əhatə olunan parkın birinci hissəsi 2019-cu il mayın 22-də Prezident İlham Əliyevin və birinci xanım Mehriban Əliyevanın iştirakı ilə istifadəyə verilib. Avstriyalı memar Yans Hoffmanın layihələndirdiyi Mərkəzi Parkın salınmasında məqsəd Bakının simasını daha da gözəlləşdirmək, paytaxt sakinlərinin və turistlərin mədəni istirahətini müasir xidmətlərə uyğun təşkil etməkdir. Parkın ikinci hissəsinin açılışı isə 2022-ci il dekabrın 30-da olub. Prezident İlham Əliyev açılışda iştirak edib. Dövlətimizin başçısı 2024-cü il noyabrın 7-də Mərkəzi Parkın üçüncü hissəsinin açılışında olub. Mərkəzi Parkın bu hissəsinin istifadəyə verilməsi ilə keçmiş “Sovetski” adlanan ərazidə salınan parkın ümumi sahəsi 35,4 hektara çatdırılıb və bura paytaxtın ən gözəl istirahət guşələrindən birinə çevrilib. Layihəyə əsasən, ərazi yüksək səviyyədə abadlaşdırılıb, burada müasir tələblərə uyğun yeni infrastruktur yaradılıb, şəhər sakinləri və qonaqların səmərəli istirahəti üçün paytaxta xüsusi yaraşıq verən park ərsəyə gəlib.
Dövlət Şəhərsalma və Arxitektura Komitəsinin mətbuat katibi Ramiz Həsənov AZƏRTAC-a bildirib ki, növbəti mərhələdə əlavə olaraq təxminən 21 hektar ərazinin yenidən qurulması və layihələndirilməsi nəzərdə tutulur: Ərazinin iqlim şəraiti, florası və ekoloji xüsusiyyətləri nəzərə alınmaqla burada geniş yaşıllıq zolaqları, süni göl, idman və mədəni tədbir zonaları, uşaqlar üçün oyun meydançaları, həmçinin qapalı avtomobil dayanacağı yaradılacaq. Yeni layihə çərçivəsində həmin infrastruktur da tamamilə yenidən qurulacaq. Baş plana əsasən, Təzəpir məscidi ətrafındakı tarixi məhəllə də müasir şəhərsalma standartlarına uyğun abadlaşdırılacaq. Bu ərazidə həm dövlətin xüsusi mühafizəsində olan tarixi abidələr, həm də abidə statusu daşımayan, lakin tarixi dəyərə malik binalar yerləşir. Layihə çərçivəsində həmin tikililərin bərpası və ümumi konsepsiyaya inteqrasiyası da nəzərdə tutulur.
Bölmənin digər xəbərləri
