BAKIDA VII BEYNƏLXALQ NƏQLİYYAT, TRANZİT VƏ LOGİSTİKA SƏRGİSİ AÇILMIŞDIR
AZƏRTAC xəbər verir ki, mayın 21-də Heydər Əliyev adına İdman-Konsert Kompleksində Böyük Britaniyanın İTE Group PLC və onun Azərbaycandakı tərəfdaşı İteca Caspian LLC şirkətlərinin birgə təşkilatçılığı ilə VII Beynəlxalq nəqliyyat, tranzit və logistika sərgisi - “TransCaspian-2008” açılmışdır.
Bu münasibətlə keçirilən mərasimdə Azərbaycan nəqliyyat nazirinin müavini Musa Pənahov, Ticarət və Sənaye Palatasının vitse-prezidenti Mehman Əhmədov və İteca Caspian şirkətinin direktoru Fərid Məmmədov sərginin əhəmiyyətindən danışmış, respublikamızda aparılan iqtisadi islahatlar nəticəsində ölkənin hərtərəfli inkişaf etdiyini diqqətə çatdırmışlar.
Qeyd olunmuşdur ki, əsası ümummilli liderimiz Heydər Əliyev tərəfindən qoyulmuş və Prezident İlham Əliyevin uğurla davam etdirdiyi sosial-iqtisadi islahatlar ölkəmizə dünyanın aparıcı şirkət və təşkilatlarının marağını ilbəil artırır. Azərbaycanın yol-nəqliyyat kompleksinin inkişafı, beynəlxalq imicinin artması, qlobal nəqliyyat infrastrukturunda öz yerini tutması Bakıda artıq 7-ci dəfədir ki, keçirilən Beynəlxalq nəqliyyat, tranzit və logistika sərgisinə diqqətin çoxalmasına səbəb olmuşdur.
Prezident İlham Əliyevin Azərbaycanda nəqliyyatın dinamik inkişafına xüsusi diqqət yetirdiyini vurğulayan Musa Pənahov bu sahədə görülmüş və qarşıdakı illərdə həyata keçiriləcək işlər barədə danışmışdır. Azərbaycanın beynəlxalq nəqliyyat dəhlizlərinin kəsişdiyi ərazidə yerləşən bir ölkə olduğu, coğrafi-siyasi və coğrafi-strateji mövqeyinə görə Asiya və Avropa arasında mühüm əlaqələndirici rol oynadığı, nəqliyyat əlaqələrinin inkişafı çərçivəsində iri layihələrin həyata keçirilməsində fəal iştirakı qeyd edilmişdir. Nazir müavini bu istiqamətdə əsası ümummilli lider Heydər Əliyev tərəfindən qoyulmuş, 12 ölkəni birləşdirən qədim Böyük İpək yolunun bərpası ilə bağlı həyata keçirilən TRASEKA layihəsinin əhəmiyyətini, layihə çərçivəsində Bakı-Tbilisi-Qars dəmir yolu xəttinin tikintisinə başlanmasının Azərbaycan, Gürcüstan və Türkiyə, ümumilikdə region üçün iqtisadi cəhətdən vacibliyini nəzərə çarpdırmışdır. Son illər ölkənin yol-nəqliyyat kompleksinin inkişafı məqsədi ilə ayrılmış investisiyaların məbləğinin ilbəil artdığı, cari ildə bu məqsədlə 2 milyard həcmində vəsaitin ayrıldığı xüsusi qeyd edilmişdir.
Tədbirdə iştirak edən şirkətlərin təxminən 40 faizinin Azərbaycan bazarına ilk dəfə gəldiyi, yerli təşkilatların ümumi ekspozisiya sahəsinin 60 faizdən çox hissəsini tutduğu, sərgidə Azərbaycanla yanaşı, Almaniya, Koreya Respublikası, Kanada, Rusiya, Türkiyə, Rumıniya, Ukrayna, Gürcüstan, Estoniya və digər ölkələrdən 50-dən artıq şirkətin, həmçinin bir çox dövlət qurumlarının iştirak etdiyi qeyd edilmişdir. Sərginin bir çox yerli və xarici şirkətlər arasında əməkdaşlıq əlaqələrinin qurulması, şirkətlərin ölkəmiz və onun böyük iqtisadi potensialı haqqında daha geniş məlumat əldə etməsi, bizneslərinin Azərbaycanda təşkili, tərəfdaşlıq əlaqələrinin genişlənməsi istiqamətində faydalı olacağı bildirilmişdir.
Açılış rəmzi olan qırmızı lent kəsiləndən sonra iştirakçılar sərgi ilə tanış olmuşlar.
Sərgi mayın 23-dək davam edəcəkdir.
######
 |
 |
Bölmənin digər xəbərləri
