Bakı, 3 sentyabr, Elvin Camalov, AZƏRTAC

Bu gün Bakıdan “Domodedovo” hava limanına gedən təyyarə vaxtında və problemsiz eniş edib.

“Azərbaycan Hava Yolları” QSC-dən AZƏRTAC-a bildirilib ki, “Domodedovo” hava limanında yanğın baş verdikdən sonra Heydər Əliyev Beynəlxalq Hava Limanından “Domodedovo” hava limanına gedən təyyarənin hərəkət cədvəlində dəyişiklik olmayıb. Uçuşdan əvvəl Moskva dispetçerləri xəbər ediblər ki, Bakıdan qalxan təyyarə “Domodedovo” hava limanına gələnədək problem aradan qalxacaq.

Xatırladaq ki, bu gün səhər saatlarında Rusiyanın paytaxtı Moskva şəhərində yerləşən “Domodedovo” hava limanında yanğın baş verib və 3 minə yaxın insan təxliyə edilib. Yanğın tez bir zamanda aradan qaldırılıb, lakin 60-dək reysin gecikməsinə səbəb olub. Onlardan 32-si artıq həyata keçirilib. Yaxın saatlarda “Domodedovo” hava limanın adi rejimdə çalışacağı bildirilir.