Balakən, 11 sentyabr, Mustafa Dadaşov, AZƏRTAC

Bu il Balakən rayonunun torpaq mülkiyyətçiləri 2065 hektar sahədə tərəvəz bitkiləri əkiblər. Hazırda təsərrüfatlarda tərəvəz yığımı davam edir. İndiyədək 1693,1 hektar sahənin məhsulu yığılıb, 25 min 671 ton tərəvəz istehsal olunub. Bu, ötən ilin müvafiq dövrü ilə müqayisədə 1852 ton çoxdur. Hər hektardan orta məhsuldarlıq 151,6 sentner təşkil edib.

Bu barədə AZƏRTAC-ın bölgə müxbirinə Balakən Rayon Statistika İdarəsindən məlumat verilib.

Bildirilib ki, mövsümün əvvəlindən indiyədək rayonda 12,5 min tondan çox xiyar, 5568 ton pomidor, 3149 ton yaşıl lobya, 1253 ton baş soğan, 928 ton sarımsaq və digər tərəvəz məhsulları istehsal olunub.

Təsərrüfatlarda kartof və bostan bitkilərinin yığımı isə artıq başa çatıb. Torpaq mülkiyyətçiləri kartof əkilmiş 627 hektar sahədən 6443 ton məhsul yığıblar. Hər hektarda orta məhsuldarlıq 102,8 sentner təşkil edib. Bostan bitkiləri əkilmiş 344 hektar sahədən isə 4176 ton məhsul yığılıb.