Balakən, 13 dekabr, Mustafa Dadaşov, AZƏRTAC

Balakən rayonunda təkrar əkinlərə maraq ildən-ilə artır. Bu da təsadüfi deyil. Təkrar əkinlər fermerlər üçün il ərzində ikinci dəfə subsidiya almaq imkanı, əlavə gəlir, həmçinin torpaqdan səmərəli istifadə deməkdir. Balakənli fermerlər artıq üçüncü ildir ki, taxıl biçini başa çatdıqdan sonra təsərrüfatlarında təkrar qarğıdalı əkini aparırlar. Cari təsərrüfat ilində rayonda 465 hektar sahədə dən üçün təkrar qarğıdalı əkilib. Təkrar əkin sahəsi əvvəlki illə müqayisədə 100 hektaradək artırılıb. Torpaq mülkiyyətçiləri cari mövsümdə təkrar əkin sahələrindən 1852 ton dən qarğıdalı tədarük ediblər. Hər hektardan 40,5 sentner məhsul götürülüb.

Bu barədə AZƏRTAC-ın bölgə müxbirinə Balakən Dövlət Aqrar İnkişaf Mərkəzinin bitkiçilik sektorunun müdiri Şahin Rəhimli məlumat verib.

Qurum rəsmisi bildirib ki, bu il rayonda 101 nəfər torpaq mülkiyyətçisi təsərrüfatlarında təkrar əkin aparıb. Fermerlər əsasən dənlik qarğıdalı əkininə üstünlük veriblər. Şərif kəndindən fermer Mahama Kanayev 13, 6 hektar təkrar qarğıdalı sahəsindən 140 ton məhsul götürüb. Hər hektardan məhsuldarlıq 100 sentnerdən çox olub. Şambul kəndindən İzəddin Omarov isə bu il 12,3 hektar sahədən 65 ton məhsul götürməyə müvəffəq olub. Hər hektara görə orta məhsuldarlıq 52,9 sentner təşkil edib.

Qeyd edək ki, təkrar qarğıdalı əkininə görə fermerlərə dövlət tərəfindən hər hektara 86 manat subsidiya ödənilir. Təkrar əkinlər həm aqroekoloji, həm də iqtisadi baxımdan səmərəlidir. Mütəxəssislərin sözlərinə görə, payızlıq taxıl biçini başa çatdıqdan sonra sahələr yeni əkinə qədər bir neçə ay boş qalır. Bu müddətdə vegetasiya müddəti qısa olan bitkilərdən istifadə etməklə əlavə, ikinci məhsul almaq mümkündür. Məhsul istehsalını artırmaq, həmçinin mal-qaranın yaşıl yemə olan tələbatını tam təmin etmək üçün təkrar əkinlərdən istifadə vacib sayılır. Ölkə üzrə təkrar əkin sahələrinin hər hektarından 350-400 sentner yaşıl kütlə və ya 40-50 sentner dən qarğıdalı əldə etmək mümkündür.