BANM məzunu ABŞ universitetini fəth etdi
Bakı, 7 iyun, AZƏRTAC
SOCAR-ın Bakı Ali Neft Məktəbinin (BANM) məzunu Orxan Xankişiyev “İlin ən aktiv magistratura tələbəsi” seçilib. Elmi və sosial fəaliyyətləri ilə fərqləndiyi üçün ABŞ-ın Oklahoma Universitetinin Neft-qaz mühəndisliyi şöbəsi tərəfindən “İlin ən aktiv magistratura tələbəsi” mükafatını qazanıb.
Bu barədə AZƏRTAC-a BANM-dən məlumat verilib. Bildirilib ki, Orxan Xankişiyev 677 bal toplayaraq Bakı Ali Neft Məktəbinə neft-qaz mühəndisliyi ixtisası üzrə qəbul olub. Ali məktəbi bitirdikdən sonra, iki il ərzində “SOCAR-AQŞ” MMC-də dəniz geoloqu işləyib, neft quyularının qazılması üzrə təcrübə əldə edib.
2022-ci ildə isə tam təqaüdlə Oklahoma Universitetində neft-qaz mühəndisliyi üzrə magistratura səviyyəsinə qəbul olub. O, iki il ərzində dayanıqlı enerji mənbələri, xüsusilə də geotermal enerji mövzusunda bir neçə elmi tədqiqat aparıb və məqalələr çap etdirib. Eləcə də geotermal quyuların qazılma sürətini və səmərəliliyini artırmaq üçün yeni qazma qurğusu inşa edərək bir sıra təcrübələr aparıb.
Hazırda sözügedən universitetdə doktorantura təhsilini davam etdirir və geotermal quyuların istismarı mövzusunda tədqiqat layihəsi üzərində çalışır.
Bölmənin digər xəbərləri
