Bakı, 14 noyabr, AZƏRTAC

COP29-da inkişaf etməkdə olan kiçik ada dövlətləri üçün mühüm qərarlar verilməlidir.

Bu sözləri Barbadosun Baş nazirlik ofisinin naziri Şantal Munro Nayt AZƏRTAC-a açıqlamasında deyib.

O bildirib ki, COP29-da əsasən maliyyə məsələləri üzərində razılığa gəlmək çox vacibdir. "COP29-un uğurlu olmağı üçün biz “Yeni Kollektiv Kəmiyyət Məqsədi” ilə bağlı qərar qəbul etməliyik. Kiçik ada dövlətlərinin inkişafına dəstək göstərilməsi prioritetlərimizdən biridir. Biz ölkəmizdə qarşılaşdığımız problemləri həll etmək üçün kifayət qədər maliyyə resursları əldə etməliyik”, - deyə nazir bildirib.

Şantal Munro Nayt bildirib ki, inkişaf etmiş ölkələrin Paris Sazişi üzrə götürdükləri öhdəlikləri yerinə yetirməsi, xüsusilə kiçik və inkişaf etməkdə olan dövlətlər üçün maliyyə təminatının ayrılması COP29-da həlledici əhəmiyyət daşıyır: “Bu, bizim vətəndaşlarımıza lazım olan dəstəyi çatdırmaq üçün vacib olacaq”, - deyə o qeyd edib.

Nazir Azərbaycan hökumətinin COP29 təşkilatçılığını yüksək qiymətləndirərək əlavə edib ki, Azərbaycan COP-un səmərəli keçməsi üçün müxtəlif təşəbbüslərlə çıxış edir:

“Məsələn, əsas nümayəndə heyətlərini bir araya gətirmək üçün xüsusi təlimlər təşkil edilməsi COP29 müzakirələrinin irəliləməsinə töhfə verib. Tam əminəm ki, Azərbaycan hökuməti nəticə əldə etmək üçün əlindən gələni edəcək və bu, ölkələrimiz üçün vacibdir”, - deyə nazir bildirib.

Şantal Munro Nayt, həmçinin Azərbaycanın iqlim dəyişikliyinə uyğunlaşmaq və sıfır karbon emissiyasına nail olmaq yolunda bir sıra uğurlu modellərə sahib olduğunu bildirib: "Azərbaycan bu sahədə xeyli irəliləyiş əldə edib və bu təcrübələrdən öyrənməyi, onları Barbados kimi kiçik dövlətlər üçün tətbiq etməyi gözləyirik”.