Bakı, 19 yanvar (AZƏRTAC). AZƏRTAC Lenta.ru saytına istinadla bildirir ki, futbol üzrə İspaniya kubokunun ¼ finalında Madridin “Real” komandasına qarşı oyunda “Barselona” yığmasının qapısını qorumaq ehtiyat qolkiper Xose Pintoya həvalə ediləcəkdir. Bu barədə məlumat verən “Barselona”nın baş məşqçisi Xosep Qvardiola həm də bildirmişdir ki, son illər Pinto, bir qayda olaraq, yüksək ustalıq nümayiş etdirir. Qvardiola qeyd etmişdir ki, “Real” ilə matçda onun komandası, güclü rəqibdən ehtiyat etmədən, özünün adi oyun tərzində oynayacaqdır.

36 yaşlı Pinto “Barselona”nın heyətində nadir hallarda meydançaya çıxır. Lakin İspaniya kuboku yarışlarında komandanın qapısını, bir qayda olaraq, Pinto qoruyur. Görünür Qvardiola bu dəfə də ənənəni pozmaq istəməmişdir.

“Barselona” və “Real” yığmaları arasında İspaniya kubokunun 1\4 final matçı yanvarın 19-u gecəsi Madriddə keçiriləcəkdir. Cavab görüşü isə yanvarın 25-də Barselona şəhərində olacaqdır.