Bakı, 5 avqust, AZƏRTAC

Həyata keçirilən transferləri, yeni baş məşqçiləri və komandaların sərgilədiyi oyunları müşahidə edərək demək olar ki, bizi bu mövsüm çox gərgin matçlar gözləyir.

Bu fikri AZƏRTAC- açıqlamasında veteran futbolçu Aqil Nəbiyev Azərbaycan Premyer Liqasının 2024-2025-ci illər mövsümünün I turunun oyunlarını şərh edərkən söyləyib.

Mütəxəssis “Araz-Naxçıvan” – “Qarabağ” (1:4) oyununda qonaqların rahat qələbə qazandığını bildirib: “Əvvəlcədən Ağdam təmsilçisinin qalib gələcəyi gözlənilirdi. Çempionlar Liqasına görə fərqli heyətlə meydana çıxsalar da, baxımlı oyun sərgilədilər. “Araz-Naxçıvan” isə yeni qurulmuş komandadır. İlk turdan onlar barədə geniş fikir söyləmək olmaz. Lakin yayda gələn oyunçular keyfiyyətlidir. Hər şeyi zaman göstərəcək”.

Azərbaycan millisinin sabiq üzvü “Neftçi” – “Turan Tovuz” matçının qolsuz heç-heçə bitməsinin ədalətli nəticə olduğunu söyləyib: “Roman Qriqorçuk “Neftçi”də, Kurban Berdıyev isə “Turan Tovuz”da ilk rəsmi oyunlarına çıxdılar. Hər iki komanda ehtiyatlı oynadı. Meydanın ot örtüyü də yaxşı durumda deyildi. “Ağ-qaralar” hər zaman yüksək yerlər uğrunda mübarizə aparırlar. Tovuz təmsilçisinə gəlincə, bu il kluba daha çox maliyyə ayırıblar. Görünən odur ki, hədəf böyükdür. Komandalar barədə bir neçə turdan sonra daha geniş danışmaq mümkün olacaq”.

Onun fikrincə, “Sumqayıt”ın “Kəpəz”ə 2:0 hesabı ilə qalib gəlməsinə baxmayaraq, hər iki komandanın heyətində futbolçu kasadlığı var: “Bu da baş məşqçilərin işinə təsir edən ən böyük amildir. Samir Abasov özü də bunu açıqlayıb. “Kimyaçılar” Konfrans Liqasında Macarıstanın “Fehervar” komandası ilə oyunlarda bunun sıxıntısını çəkdilər. İsa Sulimanın olmaması və onun əvəzinə oynayan Murad Xaçayevin ilk matçda qırmızı vərəqə alması planları pozdu. Gəncə təmsilçisinin çalışdırıcısı Adil Şükürov da transferlərə ehtiyac olduğunu bildirdi. Demək olar ki, “Kəpəz” bu mövsüm Premyer Liqada qalmaq üçün oynayır. Çünki heyət yüksək yerlər uğrunda mübarizə aparmağa imkan vermir”.

Hazırda 16 yaşadək futbolçulardan ibarət Azərbaycan millisinə rəhbərlik edən A.Nəbiyev “Sabah” və “Şamaxı” (2:2) komandalarının ifasında əzmkar futbol izlədiyini deyib: “Meydan sahiblərinin heyətində Xəyal Əliyev ilə Şakir Seyidov çox yaxşı mübarizə apardılar. Yerli oyunçuların əsas heyətdə çox oynaması bizi sevindirir. “Sabah” “Makkabi” ilə ağır oyundan çıxsa da, ötən gün yaxşı çıxış etdi. “Şamaxı”ya gəlincə, Ayxan Abbasov sonadək oynayan komanda qurub”.

Qırx üç yaşlı çalışdırıcı “Zirə”nin “Səbail”i rahatlıqla (4:1) məğlub etdiyini bildirib: “Zirə” meydanda çox rahat mübarizə apardı. Hətta David Volkov da het-trik etdi. Bu da kimin üstün olduğunu göstərir. “Səbail” üçün mövsümün ilk rəsmi oyunu idi. Heyətində də dəyişiklər edilib. Şahin Diniyev oyundan sonra mətbuat konfransında Premyer Liqada qalmaq üçün mübarizə aparmayacaqlarını dedi. Birinci turdan nəsə söyləmək tez olar. Ancaq bəzən reallalıqlarla da barışmalısan”.

Qeyd edək ki, Azərbaycan Premyer Liqasında növbəti turun oyunlarına avqustun 9-da start veriləcək.