BDU-da Özbəkistanın Nizami adına Daşkənd Dövlət Pedaqoji Universitetinin rektoru ilə görüş
Bakı, 9 aprel, AZƏRTAC
Bakı Dövlət Universitetində (BDU) Özbəkistanın Nizami adına Daşkənd Dövlət Pedaqoji Universitetinin rektoru Abduqaffar Qırğızbayev ilə görüş olub.
Bu barədə AZƏRTAC-a BDU-dan məlumat verilib. Rektor Elçin Babayev BDU-nun beynəlxalq əlaqələrində türkdilli dövlətlərin ali məktəbləri ilə münasibətlərin önəmli yer tutduğunu, son illər Özbəkistanın nüfuzlu elm və təhsil müəssisələri ilə sıx əlaqələrin yaradıldığını və inkişaf etdiyini diqqətə çatdırıb. O, BDU ilə Daşkənd Dövlət Pedaqoji Universiteti arasında iki il əvvəl imzalanmış əməkdaşlıq müqaviləsinin qarşılıqlı əlaqələrin inkişafında xüsusi əhəmiyyət daşıdığını bildirib, təhsil sahəsi ilə yanaşı, xüsusilə müxtəlif elm sahələri üzrə birgə elmi tədqiqatların aparılmasının, ikili diplom proqramlarının imzalanmasının zəruri olduğunu diqqətə çatdırıb.
Daşkənd Dövlət Pedaqoji Universitetinin rektoru Abduqaffar Qırğızbayev elm və təhsil sahəsində ortaq layihələrin hər iki universitetin inkişafına fayda verəcəyinə əminliyini ifadə edib, pedaqogika, psixologiya istiqamətləri üzrə geniş əməkdaşlıq imkanlarının olduğunu deyib.
Görüşdə iki ali təhsil müəssisəsi arasında ikili diplom proqramlarının inkişaf etdirilməsi, müəllim və tələbə mübadiləsinin sürətləndirilməsi, birgə layihələrin həyata keçirilməsi məsələləri müzakirə olunub.
Bölmənin digər xəbərləri
